Кәмелетке толмаған бала жұмыс істеуге құқылы ма?

Балам әлі кәмелеттік жасқа толған жоқ, жасы 14-те, мектепте оқиды. Бірақ отбасы жағдайына байланысты сабағынан тыс уақытта жұмыс істегісі келеді. Біз рұқсат беріп отырмыз. Оның мұндай жаста жұмыс істеуіне құқығы бар ма?
Төлеуғайша, Семей қаласы
Балалардың 14 жастан бастап, ата-ана­сының рұқсатымен оқудан бос кезiнде денсаулығына және өсiп-жетiлуiне оңтай­лы, баланың дене бiтiмiне, рухани және психикалық жай-күйiне зиян келтiрмейтiн қоғамдық пайдалы еңбекке қатысуға, сон­дай-ақ мамандық алуға құқығы бар. Бұл құқықты халықты еңбекпен қамту қыз­метi мен жергiлiктi мемлекеттiк басқару органдары қамтамасыз етедi. Сондай-ақ әрбiр баланың еңбек бостандығына, қыз­мет және кәсiп түрлерiн еркiн таңдауда да құқықтары бар. 18 жасқа толмаған қыз­мет­кер­лермен еңбек шартын жасасу және оны бұзу тәртiбi, сонымен қатар олардың еңбегiн реттеудiң басқа да ерекшелiктерi ҚР еңбек заңна­масында белгiленедi. Егер сізді қосымша баланың еңбек бостанды­ғына қатысты құқықтары қызықтырса, 2002 жылдың 8 та­мызында қабылданған ҚР Баланың құ­қықтары туралы №345 Заңы­ның 3-тарауында толығымен көрсетілген.