Генерал-лейтенанттың шені генерал-майордан неге үлкен?

Білуімше, генерал-майор деген әскери атақ генерал-лейтенанттан төмен болып есептеледі, сол неліктен?
Миғражаддин САДЫҚ, Қызылорда
Әскери атақтың өзінің иерархиясы бо­йынша генерал-лейтенант генерал-майордан жоғары тұрады. Себебі гене­ралдар үшін иықтағы жұлдыздардың кө­лемі рөл ойнамайды, барлық жұл­дыз­дары бірдей болады. Ал офи­церлердің иығындағы жұлдыздар үл­кенді-кіші­лігі­мен ерекшеленеді. Лейте­нантқа екі кіш­кене жұлдызша берілсе, майор бір ғана үлкен жұлдыз алады. Осылайша генералдар арасында жұл­дыздың үлкені мен кішісі болмай­тын­дықтан, алдымен – майор, содан кейін барып қос жұлдызды лейтенант атағы беріледі. Ең жоғары шенді генерал төрт жұлдыз тағады. Мұн­дай армия гене­ралдары Қазақстанда екеу. Сағадат Қожахметұлы мен Мұхтар Қапашұлы. Республика бойынша генералдардың жалпы саны 50-ге жуықтайды.