Ғалымның қандай еңбектері бар?

Белгілі қайраткер ғалым Жабайхан Әбділдин қандай қызметтер атқарған және ғылымның қай саласын игерген, қандай еңбектері бар?
Нұркенже Мұратқызы, Алматы облысы
Көрнекті ғалым, философия ғылымының докторы, ака­де­мик Әбділдин Жабайхан Мүбәрәкұлы 1933 жы­лы 16 ақ­панда Павлодар облысы Май ауданы Май­тү­бек ауы­лында туған. Философия саласында өзіндік мек­теп қалып­тастыра білген ойшыл әр жылдары Қа­зақстан ғы­лым акаде­мия­сында түрлі жауапты қызмет­тер атқарған. 1990 жылы Қазақстан Жоғарғы Кеңесінің халық депутаты болып сай­ланды. 1994 жылы Тәуелсіз еліміздің тұңғыш Пар­ламентіне депутат болып, ұзақ жылдар сенатор бол­ды. Ғалымның ғы­лыми еңбектері негізінен диалекти­ка­лық логиканың өзекті мәселелерін зерттеуге арналған. Оның басқаруымен диалектикалық логиканың категория­ларын, заңдарын, принциптерін жан-жақты зерттеуге ар­налған ұжымдық моногра­фия­лар жарық көрді. Осы зерттеулердің нәтиже­сінде «Диа­лектикалық логика» аталатын төрт томдық іргелі еңбек дүниеге келді. Мұнда диалектиканың логикалық функ­циясы анық дәлелденіп, категорияларының ғылы­ми жүйесі жасалды әрі олар қазіргі жаратылыстану ғы­лым­дарының методологиялық мәселелерімен ұш­тас­тырылды. Әбділдиннің ғылыми басшылығымен 10 ғылым докторы, 40-қа тарта ғылым кандидаты да­йындалды.
Қайраткер ғалым 1987-89 жылдары Алаш арыс­тары Ш.Құдайбердіұлы, А.Байтұрсынов, М.Дулатов, М.Жұма­баев, Ж.Аймауытов шығармаларын зерттеп, оларды ақ­тау мәселесімен айналысқан арнаулы комиссия жұмыс­тарына басшылық жасаған.