Француздар қонаққа қырын қарайды екен
Елімізге келген жоғары лауазымды меймандар бізді «қонақжай халық» деп ризашылығын білдіріп жатады. Басқа халықтар да біздің басшыларымызға ілтипат көрсетеді. Менің басқа халықтардың қонақжайлығы туралы білгім келеді.
Құндыз ӘБДІРАЙЫМОВА, Астана қаласы
Әрине, қазақтар – ықылым заманнан бері қонағын құдайындай сыйлайтын халық. Бұл туралы орта ғасырлардағы орыс ғалымдарының естелік жазбаларынан көптеп кездестіруге болады. Дегенмен жақында WAYN деп аталатын кең таралған сайт сауалнама жүргізді. 6000-нан астам саяхатшы қатысқан зерттеудің қорытындысы бойынша, француз халқының қонақжайлығы өте төмен көрсеткішке ие болды. Респонденттердің 46 пайызы әлемдегі ең қонақжай емес халық деп француздарды атаған. Қонақтарға құшақ жая қоймайтын ұлттардың тізіміндегі екінші орын неміс халқына тиесілі болып шықты. Одан кейінгі сатыларда Пиреней түбегін мекендейтін испандықтар мен АҚШ халқы. Ал алғашқы ондықта Италия, Ресей, Түркия, Португалия, Қытай және Грекия елдері бар. Италия асханалары саяхатшылардың жоғары бағасын алса, керісінше, АҚШ асханаларының қонақтар үшін ең дәмсіз тамақ дайындайтыны белгілі болған.
