Қазір базардағы еттің және ет өнімдерінің санитарлық талапқа сай келмейтіні жиі айтылады. Жалпы, осы еттің талапқа сай екендігін, сапалы екенін қалай анықтауға болады?
Жазира Қамбарова, Алматы облысы
Бұл ретте Алматы мемлекеттік мал дәрігерлері білімін жетілдіру институтының маманы Күләш Құрманова былай дейді:
– Ол үшін, біріншіден, ет сатушыдан тауары туралы анықтама қағазды сұраңыз. Бұл құжаттар етті және ет өнімдерін заңды түрде сатуға шығарған сатушыларда міндетті түрде болуы керек. Бұдан соң тауардың неғұрлым арзанын алуға бейіл танытқан дұрыс емес. Азық-түлік аларда «арзан тауар – сапасыз тауар» дегенді жадыда ұстаған жөн. Қазір малдан бурцеллез, сібір жарасы тәрізді аурулардың шығып жатқанына орай, ет таңдағанда мына жайттарды да есте сақтаған абзал. Біріншіден, еттің бағасына мән беріңіз. Екінші бір ескеретін дүние – алған өніміңіздің сыртқы қабаты қабыршықтанып, қарайып кетпеген бе, осыған мән беріңіз. Егер еттің сырты қарайып, қабыршықтанып кеткен болса, онда бұл еттің ескіргендігін көрсетеді. Сондай-ақ ет аларда алған тауарыңыздың иісіне айрықша назар аударыңыз. Өнімді иіскеп көрсеңіз де болады. Мұның еш әбестігі жоқ. Себебі – қандай да бір еттің бұзылғанын, ескіріп кеткенін жасыру мақсатында бүгінде сатушылар сатуға шығаратын етін сұйық хлороформен жуатын болған. Сондықтан ет сатып аларда сақтық қажет...