Еркін ақын туралы не білеміз?

Мұқағали туралы айтылғанда Еркін Ібітановтың есімі қатар айтылады. Е.Ібітанов та Қарасазда туған ба?
Нұрзия Қалиева, Ақтөбе қаласы
Мұқағалидың жерлес, қаламдас ақын бауыры Еркін Ібітанов 1935 жы­лы 6 маусымда Алматы облысы, Райымбек ауданы (бұрынғы На­рын­қол), Қаратоған ауылында дүниеге кел­ген. Еңбек жолын бастауыш мек­тепте ұстаздық қызметтен бастаған. Кейін аудандық «Хан-Тәңірі» (бұ­рынғы «Советтік шекара») газетінде ре­дакцияның бөлім бастығы, ре­дак­тордың орынбасары болды. Осы редакция жанынан құрылған М.Ма­қа­таев атындағы әдеби бір­лес­тіктің жетекшісі бола жүріп, бүгінгі таңдағы әдебиетіміздегі орны бар ондаған қалам иелерінің қалып­та­суы­на ықпал етті. Ол әдебиетімізге 1959 жы­лы жарық көрген «Көктем ты­ны­сы» атты жас ақындардың топ­та­ма­сында жа­рық көрген шуақты да отты өлең­де­рімен батыл қадам жа­са­ды. Содан соң сол кездегі әдеби ор­таны та­лассыз мойындатқан, тың та­қы­рып­тағы «Қой­шылар» атты поэ­ма­сымен жар­қырай көрінді. Ақынның «Арман әле­мі», «Хан-Тәңірі, қай­да­сың?», «Қасі­рет­ті де қасиетті ға­сы­рым», «Ел­шен­бүйрек» атты жыр жи­нақтары өлең­сүйер қауымның іздеп жүріп оқитын туындыларына ай­нал­ды. Мұқағали Мақатаев екеуінің ара­сын­дағы ағалы-інілік сыйластық, шы­ғар­ма­шылық достық байланысы айрық­ша еді. Е. Ібітановтың «Мен білетін Мұ­қа­ғали» атты деректі эссесі – ұрпаққа үлгі боларлық тағылымы биік өнеге көрінісі. Ақын Еркін Ібітанов осыдан екі жыл бұрын 75 жасқа қараған ша­ғын­да дүниеден озды.