Еңбекке жарамсыздық парағы бойынша ақы қалай төленеді?

Туберкулезбен ауырған науқасқа еңбекке жарамсыздық парағы бойынша ақы қалай төленеді?
Мәжит БЕЙНЕҒАЛИЕВ, Атырау облысы
Еңбекті нормалау және еңбекке ақы төлеу басқармасының сарапшы маманы берген мәліметке қарағанда, әлеуметтік жәр­дем­ақы тағайындау тәртібі және төлеу, сондай-ақ оның мөлшерін айқындау Қазақстан Республикасы Үкіметінің 2007 жылғы 28 желтоқсандағы № 1 339 қаулысымен бекітілген ере­женің 5-тар­мағына сәйкес, жәрдемақы еңбекке қабілет­сіздігінің алғашқы күнінен бастап еңбекке қабілеті қалпына келген күнге дейін немесе мүгедектігін белгілегенге дейін жұмыс істейтін орны бойынша төленеді. Ереженің 7-тармағына сәйкес, нақты қызметкердің ай­лық жәрдемақысының мөлшері оның орташа күндік жалақысын еңбекке уақытша жарамсыздық парағына сәйкес төленуге жататын жұмыс күндерінің санына көбейту жолымен айқындалады. Бұл ретте, Ереженің 6-тармағына сәйкес, айлық жәрдемақының мөл­шері Ережеде белгіленген жағдай­ларды қоспағанда, 15 еселенген айлық есептік көрсеткіш шамасынан аспауға тиіс. Сондай-ақ Ереженің 9-тармағына сәйкес, Ұлы Отан соғысының жұмыс істейтін қатысушыларына, мүге­дектері мен оларға теңестірілген адамдарға жәрдемақы еңбек қабілетін жоғалтқан алғашқы күн­нен бастап орташа айлық жалақының 100 пайызы мөлшерінде төле­неді. Сонымен бірге қызметкердің еңбек жарақатына немесе кәсіби науқастануына байланысты жәрдемақыны жұмыс беруші еңбекке жарам­сыздық басталған алғашқы күннен бастап жұмысқа шыққанға немесе мүгедектік белгіленгенге дейін орташа жала­қының 100 пайызы мөлшерінде төлейді.
Бұл ретте, ҚР Еңбек кодексінің 159-бабына сәйкес, жұмыс бе­­ру­шiлер қызметкерлерге Қазақстан Республикасының заңна­масында белгiленген әлеуметтiк жәрдемақы мөлшерiне қосым­ша төлемдер белгiлеуге құқылы.