Елордадағы достық монументінің авторы кім?

Еліміздің бас қаласы Астанада ұлтаралық татулықты,  халықтар ын­ты­мақ­тастығын  паш етіп тұрған  «Халықтар достығы»  монументі бар. Қала ор­та­лығында жарасым  тапқан осы  ескерткіштің авторы кім екенін білуге бола ма?
Талап Әбілқасым, Алматы қаласы
2003 жылы бой көтерген бұл монументтің авторы – белгілі мүсінші Сәкен Нарынов. Елдік пен достықтың белгісіне айналған ол биіктігі сегіз метр болатын  үш бейнеден тұрады. Монументте тарихи тағдыр біріктірген адамдардың ынтымағы өзара бай­ла­ныс­қан үш қол арқылы өрнектелген. Басы мен шегі жоқ мұндай тораптар ұзақ өмірді, шексіз бақытты және тонның ішкі бауындай жарасымдылықты білдіреді. Мү­сіннің жанындағы субұрқақтардан ор­ман тә­різ­ді композиция жасалған. Әр су­бұр­қақ ор­таша мөлшердегі гранитті тақ­та­­лар­дың қиылысында орын тепкен. Сә­кен На­ры­новтың айтуынша, бұрқақтар елі­мізде қа­лыптасқан көптүрлі мәдениет үй­ле­сімді­лі­гін меңзейді.