Елебеков жайлы еңбектің авторы кім?
Жуырда қазақтың талантты әншісі Жүсіпбек Елебеков туралы кітап шықты деп естіп едім. Бұл еңбектің авторы кім?
Сәбит Дүсебайұлы, Алматы облысы
Қазақстанның Халық әртісі Жүсіпбек Елебековтің өмірі мен шығармашылығына арналған кітаптың авторы белгілі өнертанушы, дәстүрлі әнші Ерлан Төлеутай.
«Қазақфильм» АҚ баспасөз қызметінің хабарлауынша, аталған еңбек ҚР Мәдениет және ақпарат министрлігінің «Әдебиеттің маңызды түрлерін басып шығару» бағдарламасы бойынша «Әйгілі адамдар» сериясымен жарық көрген. Бұл кітапта Қазақстанның Халық әртісі, әнші Ж. Елебековтің өнегелі өмірі мен тағылымды өнер жолы турасында егжей-тегжейлі баяндалады. Ғұмырнамалық хикаятта ұлы әншінің өмір сүрген дәуірі тұтас қамтыла зерттелген және Ж.Елебековтің замандастары, қазақ өнері мен мәдениетінің қайраткерлері, атап айтқанда: Қалибек Қуанышбаев, Ахмет Жұбанов, Шәкен Айманов, Әбікен Хасенов, Құрманбек Жандарбеков, Рамазан Елебаев, Орынбек Беков, Тоқбай Жұмағұлов және т.б. өнер тарландары жайында да құнды деректер молынан берілген. Жаңа кітап алдағы күндері республикамыздағы кітап дүкендері мен кітапханаларға түседі.
