«Ел іші – өнер кеніші» байқауының шарттары қандай?
«Ел іші – өнер кеніші» атты байқау өтеді деп естіп едім. Байқаудың ұйымдастырушылары кімдер және оның талап-ережелері қандай?
Айбол Дүйсенбекұлы, Алматы облысы
«Ел іші – өнер кеніші» атты республикалық телевизиялық халық шығармашылығы байқауын еліміздің Мәдениет және ақпарат министрлігі жариялап отыр.
Министрліктің баспасөз қызметі таратқан мәліметтерге сүйенсек, байқауға республикамыздың барлық аймақтарының, Алматы мен Астана қалаларының көркемөнерпаз шығармашылық ұжымдары мен 15-35 жас аралығындағы жеке орындаушылар қатыса алады. Байқаудың басты міндеті – жас дарындарды анықтау және таланттарға, өзіндік ерекшеліктері бар шығармашылық ұжымдар мен орындаушыларға қолдау көрсету.
Байқау музыка және би, театр өнері және оригиналды жанр, бейнелеу және сәндік-қолданбалы өнер сияқты үш аталым бойынша өтеді.
Байқау аймақтардағы сұрыптау кезеңінен құрастырылып, Астанада өткізілетін гала-концертпен аяқталады және БАҚ беттерінде жарияланады. Байқау үстіміздегі жылдың мамыр-қараша айлары аралығында өткізіледі. Байқауға қатысуға өтінішті жергілікті жерлердегі мәдениет басқармалары қалыптастырып, байқаудың өткізілу мерзімі мен орны туралы ақпаратты Мәдениет және ақпарат министрлігіне 2012 жылдың мамыр айына дейін ұсынады. Қатысушылардың шығарманы орындау ұзақтығы 3-5 минуттан аспауы керек. Ең үздік ұжымдар мен орындаушылар Астанада өтетін қорытынды гала-концертке қатысады. Байқаудың жеңімпазы әділқазылар алқасының шешімі бойынша гала-концертте анықталады. Байқау туралы толық мағлұматты www.mk.gov.kz алуға болады.
