Еден жуушыларға жалақы қандай санат бойынша төленуі керек?

Қызметтік және кәсіптік ғимараттағы еден жуушыларға бірінші санатпен ақы төленеді екен. Білім саласындағы еден жуушыларға да жалақы санат бойынша төленуі керек пе?
Есенгүл СӘРСЕНБАЕВА, Алматы облысы
Еңбекті нормалау және еңбекке ақы төлеу басқармасының сарап­шы маманының мәліметінше, азаматтық қызметшілерге еңбекақы төлеу жүйесі «Азаматтық қызметшілерге, мемлекеттік бюджет қара­жаты есебінен ұсталатын ұйымдардың қызметкер­леріне, қазыналық кәсіп­орындардың қызметкерлеріне еңбекақы төлеу жүйесі туралы» Қазақстан Республикасы Үкіметінің 2007 жылғы 29 желтоқсандағы №1400 қаулысымен реттеледі. Қаулының 3-тар­мағына сәйкес, ұйымдар қыз­меткерлерінің лауазымдық жалақылары (ставкалары) (ЛЖ) атқаратын лауа­зымдарының лауазымдар санат­тарына жатқы­зылуына және мамандығы бойынша жұмыс өтіліне, тағайындалған біліктілік раз­рядтарына (жұмысшылар үшін) қарай лауазымдық жалақы­ларын (ставкаларын) есептеу үшін бекітілген тиісті коэффи­циенттерді Қазақстан Республикасының Үкіметі белгілеген базалық лауазымдық жалақының (БЛЖ) мөлшеріне көбейту жолымен айқындалады. Қазақстан Рес­публикасы Еңбек кодексінің 125-бабына сәйкес, орындалатын жұмыстарды белгiлi бiр күрделiлiкке жатқызу және қызметкерлерге бiлiктiлiк разрядтары мен санаттарын беру Жұмысшылардың жұмыстары мен кәсiптерiнiң бiрыңғай тарифтiк-бiлiктiлiк анықтамалығына және басшылардың, мамандардың және басқа да қызметшiлер лауазым­дарының бiлiктiлiк анықтама­лығына, жұмысшы кәсiптерiнiң тарифтiк-бiлiктiлiк сипаттама­ларына және ұйымдар басшыларының, маман­дар­дың және басқа да қызметшiлер лауазымдарының үлгiлiк бiлiк­тiлiк сипаттама­ларына сәйкес жүргiзiледi.
«Еден жуушы» кәсібі бойынша біліктілік сипаттамасы орындалатын жұмыстың күрделілігіне қарай тарифтік разрядты (1-2 разряд диапазоны) иеленеді. Жұмысшылардың лауазымдық жалақыларын (ставкаларын) есептеуге арналған коэф­фициенттер қаулыға 3-қосымшада берілген.БЛЖ бүгінгі күні 17 697 теңгені құрайды.