Дұға жасағаннан кейін бетті сипау дұрыс па?
Кейбір адамдар «дұға жасағаннан кейін бетті сипау шариғатта жоқ» деп қарсы дау айтып жүр. 
Осының ара-жігін ажыратып берсеңіздер. Бұл туралы хадистер бар ма?
Амантай РЫМЖАНОВ, Қостанай облысы
Пайғамбарымыздың (с.ғ.с.) дұғадан кейін бет сипағанға байланысты көптеген хадистері бар. Мысалы, бір хадисте «Пайғамбарымыз (с.ғ.с.) қолдарын дұға ету үшін көтерер болса, оны жүзіне сипамастан түсірмейтін еді» делінсе, екінші бір хадисте «Пайғамбарымыз (с.ғ.с.) Алла тағаладан тілеген кезде алақандарыңның сыртымен емес, ішімен тілеңдер және алақандарыңды жүздеріңе сипаңдар деді» делінген. Бұл туралы басқа да хадистер бар.
Пайғамбарымыздың (с.ғ.с.) басқа бір хадисінде дұға үшін жайылған қолдың Алла тағаланың рақымы мен шарапатынсыз қайтарылмайтындығы айтылған.
«Сендердің Раббыларың ұлы ұят иесі әрі жомарт. Сондықтан қолдарын дұға үшін жайған уақытта оны бос (рақымы мен шарапатынсыз) қайтаруға құлынан ұялады». Міне, сондықтан дұға жасаған адам бетін сипаған уақытта алақанындағы Ұлы Жаратушыдан келген береке мен шарапатты өзінің ең қасиетті ағзасы – бетіне тәбәрік етіп жатқандай болады.
Бұған қоса Пайғамбарымыз (с.ғ.с.) алақанын жайып «Ықылас», «Фалақ», «Нас» сүрелерін оқығаннан кейін жүзіне, денесіне сипағаны жайлы көптеген сахих хадистер бар.
