«Дипломмен – ауылға!» бағдарламасы туралы ақпарат керек
Мен қазақтың киелі білім ордасы – ҚазҰУ-дің балық шаруашылығы мамандығын 2010 жылы тамамдадым. Қазір туған жерім Бақанаста, Бірлік елді мекенінде тұрып жатырмын. Білгім келгені – «Дипломмен – ауылға!» бағдарламасына қатысуыма қаншалықты мүмкіндігім бар және ол үшін қайда баруыма болады? Мен алған білімімді ел игілігі үшін жұмсасам деймін.
Асхан, Алматы облысы
Шынымен де, кімге, қайда бару керектігін ешкім айтпайды. Ол бағдарламаға қалай ілігуге болады және қандай мамандар керектігін қайдан білеміз?
Ерлан, сайтымыздағы оқырман
«Дипломмен – ауылға!» бағдарламасын іске асырушылардың бірі Ауыл шаруашылығы министрлігі болғандықтан, егер оқу орындарының түлегі ауылға қажет мамандық бойынша білім алған болса, бұл бағдарлама аясында жұмыс табуыңызға мүмкіндігіңіз бар. Бірақ бағдарламаға қатысты мәселе әр аймақтың өз ерекшелігіне, еңбек нарығына қарай түрліше болуы мүмкін, қажет мамандар мен қойылатын талаптар да. Сол себепті бұл бағдарламаға қатысу үшін ең алдымен баратын елді мекеннің атқарушы органдарына хабарласып, мәлімет алып, тіркелу қажет. «Нұр Отан» ХДП партиясы өкілдерінің мәліметінше, қазір жастардың көбі әкімдіктерге тікелей хабарласпай, ғаламтордан ақпарат алғысы келеді. Оның орнына әкімдіктердегі ішкі саясат немесе жастар саясаты бөлімдеріне хабарласқан жөн.
