Депутаттардың кімдерге сұрау салуға құқы бар?

Депутаттар халықтың биліктегі өкілдері болып саналады. Олар халықтың әртүрлі мәселелеріне байланысты кімдерге сұрау сала алады?
Елнар, Алматы облысы
Қазақстан Республикасының Парламенті және оның депутаттарының мәртебесі ту­ра­лы заңның 27-бабында жазылғандай, де­пу­таттық сұрау салу Парламент палаталары­ның бiрлескен және бөлек отырыстарында депутаттың мемлекеттiк органдардың лауа­зым­ды тұлғаларына осы органның немесе ла­уазымды тұлғаның құзыретiне кiретiн мә­селелер жөнiнде Парламент сессиясында негiз­делген түсiнiктеме беруiн немесе өз көз­қарасын баяндауын ресми сұраған тала­бы болып табылады. Парламент депутат­ы­ның ҚР Премьер-министрi мен Үкiмет мү­ше­лерiне, Ұлттық Банк төрағасына, Ор­та­лық сайлау комиссиясының төрағасы мен мүшелерiне, Бас прокурорына, Ұлттық қа­уiп­сiздiк комитетiнiң төрағасына, Респуб­ли­калық бюджеттiң атқарылуын бақылау жөнiндегi Есеп комитетiнiң төрағасы мен мүшелерiне сұрау салуға құқығы бар. Бұл ретте Бас прокурорға салынған сұрау қыл­мыс­тық қудалау функцияларын жүзеге асыру­ға байланысты мәселелерге қатысты бо­ла алмайды. Ұлттық қауiпсiздiк комитетi­нiң Төрағасына салынған сұрау Палаталар­дың жабық отырысында қаралады.
Сұрау салу жазбаша түрде енгiзiлуi мүм­кiн және Парламент сессиясында жария етiлуге тиiс. Өздерiне сұрау салынған ла­уазым­ды тұлғалар Парламент сессиясында ол жөнiнде ауызша немесе жазбаша жауап қайтаруға мiндеттi. Сұрау салуға жазбаша жауап әрi кеткенде бiр ай мерзiмде табыс етiлiп, сессияда жария етiледi. Сұрау салуға қайтарылған жауап бойынша жарыссөз өткiзiлуi мүмкiн. Депутат салынған сұрауына қайтарылған жауапқа өз пiкiрiн бiлдiруге ха­қылы. Депутаттар палаталардың бiрлес­кен және бөлек отырысында лауазымды тұл­ғаларға ауызша сауалдар қоюға хақылы. Сауалға жауап осы отырыста, ал жауап беру үшiн қосымша даярлық қажет болған ретте үш күн мерзiм iшiнде қайтарылады.