Бекет жайлы білгім келеді
Биыл белгілі саятшы, сазгер Бекет Есентаевтың қайтыс болғанына бір жыл толады екен. Бұл кісі жайында қазақ басылымдарында мол деректер кездестіре алмадым. Марқұмның өмірінен қысқаша мәлімет берсеңіздер.
Айнұр, студент, Қарағанды қаласы
Кезінде Кеңес өкіметі тұсында-ақ ұлттық салт-дәстүр мен қазақы өнерді дамытуға атсалысқан Бекет Есентаев 1958 жылы 4 желтоқсанда Оңтүстік Қазақстан облысы Бәйдібек ауданы Қайнар ауылында туған. Анасынан ерте айырылған ол негізінен әке тәрбиесін көріп өскен. Әкесі жастайынан аңшылықпен айналысқан. Кейін майданға қатысып, мергендігімен ерекше көзге түскен жауынгер атанды. Жалпы, жұртшылық Бекетті негізінен саятшы ретінде жақсы біледі. Ол сондай-ақ аспап жасаудың нағыз шебері болған. Әншілік, сазгерлік жолда да біраз жетістіктерге жетті. Мектепті бітірісімен ол өзі туып-өскен Бәйдібек ауданы өнерпаздарынан құралған «Шаттық» ансамблінде әнші болды. Осы өнер ұжымындағы шығармашылық жұмысын әскер қатарында болып қайтқаннан кейін де жалғастырды. Аталған ансамбльде 11 жылдай өнер көрсетіп, кейін Жезқазғанның Жезді ауданында аз уақыт тұрақтайды. Дегенмен үлкен мақсаттар мен асыл армандар Бекетті Алматыдағы өнер мен мәдениеттің қайнаған ортасына алып келеді. Өткен ғасырдың 90-жылдардың басындағы қиын-қыстау кезеңдерде ол Алматыға қоныс аударады. Әйтсе де қаланың қым-қуыт тіршілігі мен тұрмыстың қиындығына қарамастан, ол Алматыда өмірінің соңына дейін өнерді серік етіп, өзінің сүйікті шеберлік ісімен шұғылданды. Бекет Есентаев өткен жылы 6 қаңтар күні ауыр науқастан көз жұмды.
