Батыр бабаның өмір тарихын білгім келеді

Райымбек батыр қай жылдары өмір сүрген? Оның өмірге келген жылын әркім әртүрлі айтады. Соның қайсысы шындыққа сәйкес келеді?
Жанар НҰРЖАНОВА, Алматы облысы
Уикипедия — ашық энциклопедиясын­дағы  мәлімет Райымбек Түкеұлының 1705-1785 жылдары ғұмыр кеш­ке­нін жа­зады. Батыр, қолбасшы. Ұлы жүз албан ішін­дегі алжан руының сырымбет тарма­ғынан. Атасы Хангелді батыр XVIII ғасыр­дың І жартысында жоңғарларға қарсы күресте аты шығып, 1733 жылы Төле, Қодар билер, Сатай, Бөлек батырлармен бірге Ұлы жүз қазақтары атынан орыс патшайы­мы Анна Иоановнаға елші жіберген. Райымбек 17 жасында жоңғар басқын­шыларына қарсы күресте ерлік көрсетіп, батыр атанды. Қалмақтың Бадам,  Ағанас, Секер т.б. хан, ноян, батыр­ларын жекпе-жекте жеңіп, Қаратау өңірі мен Жетісуды жаудан азат етуге басшылық жасағандар­дың бірі болған. Торайғыр және Сөгеті таулары аралығындағы «Ойрантөбе» деген жерде өткен шайқаста ерекше көзге түсті. 1733 жылы Бөлек батырмен бірге жоңғарға елші болып барған. Райымбектің ерекше еңбегін оның есімі албан тайпа­сының ұранына айналғанынан да білуге болады. Көзі тірісінде көріпкел,  әулие атанған. Ол Алматы алқабында Шілік, Жалаңаш өңірінде тоған қаздырып, су шығартып, егін ектірген. Жазушы Ж.Тұр­лы­байұлы роман, ақын М.Мақатаев «Райым­бек, Райымбек!» атты поэма жазған. Алма­ты облысында Райым­бек есімімен аталатын жер-су аттары көп кезде­седі. Торайғыр тауындағы Айырлы асуының маңында Райымбек бастауы бар. Алматы облысының Нарын­қол, Кеген аудандары бірігіп, қазірде Райымбек атымен аталады, онда батырға ескерткіш орнатылған. Батырдың бейіті – Алматы қаласындағы оның есімі­мен аталатын үлкен даңғылдың бойында. Бейітінің басына кесене-күмбез тұрғызыл­ған. 1990 жылы «Райымбек» та­ри­хи-этно­г­ра­фиялық қоғамы құрылды.