«Баттл» деген қандай би?

Қазір шетел жастарының арасында «баттл» деген атаумен биленетін би түрі біздің елімізге де келіпті. Осы баттл туралы кеңірек түсіндіріп берсеңіздер.
Айдана ЕМБЕРГЕНОВА, Қостанай қаласы

Баттл – басқа би түрлеріне ұқсамайтын, еркін биленетін көше биі. Бишілер өз стильдерін көрсету үшін әртүрлі қимылдармен қозғалыс түрін дамыта отырып билейді. Баттл брейк-данс, поппинг, локинг, нью стайл, хаус билері сияқты өзіндік стилімен ерекшеленеді. Атауына орай көше биі болғандықтан, көрермендермен, көпшілікпен бірге биленеді және белгілі бір музыка жанрына байланысты қимыл-қозғалыс та құбылып, өзгере береді. Дегенмен көше тынысымен тыныстап, көшеде өспеген, көше өмірін сезіне бермейтіндіктен, оны кез келген адам билей  алмайды. Сенің бар жан-тәніңді әуен игеріп кететіндей, ырғақ бар ырқыңды меңгеретіндей болса ғана баттл бишісі атанасың. Жеңімпазды анықтау үшін көрермендердің немесе арнайы қазылар алқасының алдында баттл би жарыстары өтіп тұрады. Оған жұп болып, кейде топтанып, тіпті жалғыздан да билей береді. Бүгінде баттл биі кеңінен танымал, жарыс өтетін жерге әлемнің көптеген елдерінен арнайы келіп қатысатындар саны арта түсуде.