Балықты кез келген жерден аулауға болмайды

Алдағы сәуір-мамыр айларында балық аулауға шығуды жоспарлаған едім. Бірақ бір танысым дәл осы мерзімде балық аулауға тыйым салынады деп ескертті. Біздің өңірде қандай аудандарда балық аулауға тыйым салынған екен?
Қайрат Медеуұлы, Оңтүстік Қазақстан облысы
Расында да, жыл сайын Үкіметтің қау­лы­­сымен еліміздегі кейбір су айдын­да­рында балық аулауға тыйым салынатыны белгілі. Бұл уылдырық шашу мен балық қорының азаюына жол бермеу үшін қолданылатын уақытша шара. Биыл сіз мекендейтін оңтүстік өңірде төмендегі аймақтарда балық аулауға тыйым са­лынған: 1) Сырдария өзенінде Құр­келес өзенінің сағасынан Өзбекстан шека­расына дейін және Шардара су қойма­сының не­гізгі уылдырық шашатын бөлік­терінде – 1 сәуірден 30 маусымға дейін; 2) Шардара суқоймасы акваторийінде – 10 сәуірден 20 мамырға дейін; 3) Кіші Арал аква­торийінде – 1 сәуірден 10 маусымға дейін; Қызылорда облысындағы су айдын­дарында 20 сәуірден 10 маусымға дейін балық аулауға тыйым салынады.
Тыныштық аймағын құру мақсатында мы­надай орындарда жыл бойы балық ау­лауға тыйым салынады: 1) Арыс және Ке­лес өзендерінде; 2) Сырдарияның Кіші Аралға құятын жерінен Көкарал бөгетіне дейінгі аумақтарда;
Ескеретін бір жайт, балықтың қы­ры­луына жол бермес үшін Көкарал бөгетінің төменгі бьефінде, Кіші Арал мен Үлкен Арал теңізін жалғайтын тармағында, сон­дай-ақ Үлкен Аралға су ағызатын кезеңде бөгетке жақын 2 шақырым аймақта балық аулауға рұқсат беріледі.
Ал негізінде бүкіл ел бойынша балық аулауға тыйым салынған су айдындарының тізімі қомақты. Егер ол жайында толық мағ­­лұмат алғыңыз келсе, ол ресми баспасөзде жуырда жарық көрген.