Баланың тұсауын қалай кесемін?
Ұлым тәй-тәй басқысы кеп жағалап жүр. Тұсауын кестіртейік десек, кімге және қандай жіппен кесу керектігін білмейміз. Себебі қалада тұрамыз. Тұсау кесудің жай-жапсарын айтпайсыздар ма?
Асылғали ӘЗІМБАЕВ, Алматы қаласы
Сәбиіңіз аяғын тәй-тәй басып, жүруге талпынып жүрсе – тұсауын кесудің дер шағы. Тұсау кесудің астарында қадамы қарышты, жолы түзу болсын деген ой жатыр. Тұсауды үш нәрсемен кеседі: біреудің ала жібін аттамасын деп – ала жіппен, тоқшылық болсын деп – тоқ ішекпен, көк шөптей көкке ұмтылсын деп шөппен кеседі. Ал балаңыздың тұсауын өз орталарыңызға сыйлы, айтар ақылы мен білімі терең, көпті көрген, жүйрік адамға кестірткендеріңіз жөн. Қазақ көбіне елге сыйлы әйел адамдарға кестіртіп жатады. Тұсау кесетін адам алдын ала жіпті дайындап, баланы ортаға алып, аяғына жіпті байлап, «Тұсау кесу» жырын айтып тұрып кеседі де, шашу шашылады.
Қаз, қаз балам, қаз балам,
Қадам бассаң, мәз болам.
Тағы, тағы баса ғой,
Тақымыңды жаза ғой.
Қаз баса ғой, қарағым,
Құтты болсын қадамың!
