Балабақша тәрбиешісінің жалақысы қалай есептеледі?

Мен арнайы орта білім беру ордасын бастауыш оқыту әдістемесі ма­ман­дығы бойынша бітірдім. Балабақшаға тәрбиеші болып жұмысқа орна­лас­қаныма екі ай болды. Маған 29 мың теңге жалақы төлейді. Осы дұрыс па?
Айшара, Жамбыл облысы
Еңбекті нормалау және еңбекке ақы төлеу басқармасының сарапшы мама­ны­ның мәліметінше, азаматтық қыз­мет­ші­лер­ге еңбекақы төлеу жүйесі «Азаматтық қызметшілерге, мемлекеттік бюджет қара­жаты есебінен ұсталатын ұйым­дар­дың қыз­меткерлеріне, қазыналық кәсіп­орын­дардың қызметкерлеріне еңбекақы төлеу жүйесі туралы» Қазақстан Рес­пуб­ли­касы Үкіметінің 2007 жылғы 29 жел­тоқ­сандағы №1400 қаулысымен ай­қындалады.
Қаулының 3-тармағы бойынша ұйым­дар қызметкерлерінің лауазымдық жал­ақы­лары (ставкалары) (ЛЖ) атқа­ра­тын лауа­зымдарының лауазымдар санат­тарына жатқызылуына және мамандығы бойынша жұмыс өтіліне, тағайындалған біліктілік разрядтарына (жұмысшылар үшін) қарай лауазымдық жалақыларын (став­каларын) есептеу үшін бекітілген тиісті коэффициенттерді Қазақстан Рес­пуб­ликасының Үкіметі белгілеген базалық лауазымдық жалақының (БЛЖ) мөл­шеріне көбейту жолымен айқындалады;
Қаулыға 1-қосымшада бекітілген Аза­маттық қызметшілердің санаттар бойын­ша лауазымдарының тізіліміне сәйкес, білік­тілігі орташа деңгейдегі тәрбиеші G –11 санатына жатқызылған.
Осыған орай, еңбек өтілі бір жылға дейінгі біліктілігі орташа деңгейдегі тәр­биеші маманның жалақысы – 2,02*17697 = 35748 теңгені құрайды. Осы жалақыдан табыс салығы, зейнет­ақылық аударымдар алынады.
Егер сіздің жағдайыңызда еңбек заң­на­масын бұзушылық орын алса, өтінішпен жергілікті еңбек инспекторларына немесе сотқа шағымдануыңыз қажет.