Азия чемпионаты қай елде өтеді?

Менің білгім келгені, биыл әуесқой бокстан Азия чемпионаты қай елде және қашан өтеді?
Расылхан АМАНБЕКОВ, Астана қаласы
Бұл сұраққа Азия әуесқой бокс конфедерациясы­ның Алматыда өткен кезектен тыс Бас ассамблея­сы кезінде осы қауымдастықтың атқарушы директоры Азиз Қожам­бетов жауап берген болатын.
– Құрлықтық доданы өз жерінде өткізуге бірнеше ел өтініш білдірген болатын. Олардың арасында Қытай, Иран, Филиппин және Иордания да болды. Біз аталмыш елдердің әлеуетін және бокстың «Сарықұрлықтағы» даму стратегиясын ескере келе, Азия чемпионатын қабылдау мәртебесін Иорданияға беруді жөн көрдік. Рас, бұл елдің әлеуметтік жағдайы тұрақты болғанымен, боксы аса дамымаған. Біздің мақсатымыз – бокс спортын Азияның барлық елінде бірдей дамыту. Ал неге бұл чемпионатты қабылдауға Қазақстан өтініш білдірмеген деп сұрайтын болса­ңыздар, айтайын, біз Азия біріншілігін қабылдай аламыз. Оған қауқарымыз жетеді. Бірақ мақсатымыз – Азия чемпионатын өткізу емес, 2013 жылы өтетін әлем біріншілігін қабылдау. Бұл үшін қолымыздан келгеннің барлығын жасаудамыз, – деп Азиз Қожам­бетов мырза өз ойын білдірді.
Өз кезегімізде айта кетейік, «Сарықұрлық» до­дасы шілденің 10-ы мен 31-і аралығына бел­гі­ленген.