Атып өлтiрiлген аң етi халал ма?
Бауыздалмай, қарумен атып өлтiрiлген аң етi харам ба, әлде халал ма? 
Қамбар ӘДІЛБЕКОВ, Шығыс Қазақстан облысы
Біріншіден, ауланған аң шариғатта етін жеуге рұқсат етілген аң болуы керек.
Екіншіден, ауланған аң Алланың атын айтып ауланған жағдайда ғана халал болады. Яғни аңға оқ атқан уақытта немесе үйретілген ит-құстарды жіберген кезде «бисмилла» деп Алла тағаланың атын айту керек. Егер де «бисмилла» сөзі әдейі айтылмаса, ауланған аңның етін жеу – харам. Ұмытылып айтылмай қалған жағдайда жеуге болады.
Ауланған аң тірідей қолға түссе, «бисмилла» деп бауыздау керек. Тірідей қолға түсіп, кешіктіру себебімен бауыздаусыз өліп кетсе, ол аңның етін жеуге болмайды. Егер де атылған аң алған жарақатының салдарынан өліп кетсе немесе бауыздауға үлгермей қалса, бауыздамаса да, ол аңның етін жеуге болады.
Үйретілген иттер ұстаған аңының етін иесі келмей жатып өз білгенінше жеп қойса, ол аңның еті – харам.
Бірақ бүркіт, қаршыға сияқты жыртқыш топшалы құстар ұстаған аңдарының етінен иелері келмей жатып жеп қойған жағдайда да, ол аңның етін жеуге болады.
Аңға үйретілген ит-құстардың денелерімен соғып немесе тұншықтырып, еш жарақаттамастан өлтірген аңдарының етін жеуге болмайды. Өйткені аңшылықта аңды жарақаттау бауыздаудың орнына жүреді. Міне, сондықтан ауланған аңда жарақат жоқ болып, қан ақпаса, бауыздаусыз арам өлген болып есептеледі.
