Алғашқы журнал қашан шықты?
Бүгінде түрлі-түсті безендірілген журналдар көбейді ғой. Ең алғашқы журнал қашан, қай мемлекеттен шықты?
Асқар Беков, Семей қаласы
Ең алғашқы журналдар негізінен, Еуропада басылып шыққан. Нақтырақ айтар болсақ, дүниежүзіндегі тұңғыш журнал Францияда 1665 жылы 5 қаңтарда «Журнал де Саван» деген атпен жарық көрді. Дәл осы жылы Англияда, 1668 жылы Италияда, 1682 жылы Германияда журналдар шығарыла бастады. Алғашқы журналдар түрлі кітаптарға шолу жасап, көркем әдебиет, ғылым, көркемөнер, дін салаларындағы жаңалықтарды баяндаумен ғана шектелді. XIX ғасырдың басында журналдың түрлері қалыптаса бастады. Көпшілікке арналған аралас мазмұнды, түрлі суреттермен безендірілген журналдар көбірек шығарылды. Қазақ тіліндегі алғашқы журнал – Айқап. 1911-15 жылдар аралығында оның 88 саны жарық көрген. Айқап қазақ елінің экономикасы мен саяси жағдайы, тарихы, мәдениеті мен оқу-ағарту ісі, қазақ тілі мен әдебиеті хақында келелі сөз қозғаған, шығармаларының дені ғылыми әрі көркем туынды түрінде жарияланған журнал болды.
