Адам тіршілік етуі мүмкін жаңа ғаламшар табылды
Таяуда «адам тіршілік ете алтын жаңа планета табылыпты» деп естідім. Сол жайлы ақпарат бере аласыздар ма? Ол планетаның аты қалай аталады?
Айдана Әліәкпарқызы, Ақмола облысы
Американың Вайоминг штатының Моран қаласында таяуда өткен ғылыми конференцияда жергілікті ғалымдардың адам тіршілік ете алатын жаңа планетаны тапқандығы жайлы жергілікті «Хаффингтон пост» басылымы хабарлаған. Ғалымдардың айтуына қарағанда, ол планетада ылғалдылық жерге қарағанда әлдеқайда жоғары. Ал ауа температурасы Цельсий бағамымен 26,5-44 градусты құрайды екен. Табылған планетаның салмағы жер салмағынан 3,6 есе артық деседі.
Ғалымдардың пайымдауынша онда тіршілік ететін тірі организмдар өте аз болуы керек. Өйткені ауа температурасы және ылғалдылық жоғары болғандықтан, планетаның атмосферасы орыс моншасының буына жақын көрінеді.
Ғалымдардың тағы бір анықтағаны, планетадағы тартылыс күші жердегі тартылыс күшіне қарағанда 1,4 есе күшті.
Бұл планетаға әзірше ат қойылмапты. Оған ғалымдар уақытша «HD85512b» деп ат беріпті.
