Абай неге Көкбай болып шықты?

Алғашқы өлеңдерін Абай өз атынан емес, неге досы Көк­бай­дың атынан жазған?
Сара, Алматы қаласы
Бұл сұраққа Абай мұражайы­ның директоры, көкбайтанушы Ж.Әубә­кір былайша жауап бере­ді:
– М.Әуезовтің өзі Көкбайдың ақындығы туралы сөз қозғағанда: «Ол кезде Абай айналасындағы бар ақынның ішінде суырып­сал­ма, импровизацияға ең жүйрік ақын Көкбай болғаны даусыз. Сол та­лан­тын бағалап, Абай мұны өзі жазып жүрген алғашқы өлең­деріне ие ғып шығарады», – дей­ді. Ал Көкбай өз естелігінде: «1880 жылдан бастап 1886 жылдарға дейін Абай әрбір өлеңді жазып жүрді. Бірақ бұл уақытта сөздерінің барлығын «Көкбай сөздері» деп жүргізді. Осы хал 1886 жылға ше­йін келді де, сол жылдың жазында ел жай­лауға шықты. Абай қонып жатқан ауылды көріп, «осы суретті өлең қыл» де­ді. Мен біраз өлең қылып едім, жақ­тырмады да, өзі жаз­бақшы болды. Сонымен үй ті­гі­ліп болып, бәріміз жай­ланған соң, Абайға келіп едім: «Өлең Көкшенің бо­йынан аса­йын деді ғой», – деді. Мен: «Асса, басында мен қолқалап алған нәрсе емес еді. Енді өзіңіз ретін тауып қайта алар­сыз», – деп қалжыңдадым. Сөйт­­­сем, сол күні «Жаздыгүн шілде болғанданы» жазған екен. Оқып берді. Өзі жазған сөзіне ең алғаш рет аз да болса қанағат қылғанын көр­генім – осы. Менің қал­жы­ңы­ма орай қылып: «Сен со­ғы­мыңа бір ту бие ал, ал мен ен­ді өлеңімді өзім ала­йын», –  дейді.