Абай көне заң жайлы не деген?

Ұлы Абай ел басқару ісіне араласқан кезде «Жеті жарғыны» басшылыққа алған деседі. Сол қаншалықты рас?
Гүлсезім АМАНТАЕВА, Атырау облысы
Қазақтың бас ақыны, ұлы ғұламасы – Абай Құнанбайұлының заңгерлік, құқықтанушылық еңбегі – ғылымның бір дербес саласы. «Абай» энциклопедиясы­ның мәліметінше, Абай «Семей қазақ­тары үшін қылмысты істерге қарсы заң ережесін» дайындау кезінде «Жеті жар­ғы» баптарын негізге алған. Ол бұл заңдар жинағы туралы өзінің ғақлияла­рында да айтады. Мысалы, үшінші қара сөзінде «Бұл билік деген біздің қазақ ішінде әрбір сайланған кісінің қолынан келмейді. Бұған бұрынғы «Қасым хан­ның қасқа жолын», «Есім ханның ескі жолын», әз-Тәуке ханның Күлтөбенің басында күнде жиын болғандағы «Жеті жарғысын» білмек керек» дейді. Ұлы ойшыл «Жеті жарғыны» ел басқарудың халқымыздың салтына сіңген негізгі жүйесі ретінде танитынын аңғартады. Айта кетейік, «Жеті жарғы» хандық билік қатынастарымен бірге, ел ішіндегі, жер, жесір, мүлік дауларын реттеуді де мақсат еткен.