Шілдеден бастап ең арзан темекі 710 теңге болады
Қаржы министрі Ерұлан Жамаубаев «Бөлшек саудадағы темекінің шекті бағасын белгілеу туралы» бұйрыққа қол қойды, деп хабарлайды ҚазАқпарат тілшісі.
«20 фильтрлі, фильтрсіз сигаретке, папиростарға, сигариллаларға және қыздырылатын темекісі бар бұйымдарға:
- 2023 жылғы 1 шілдеден бастап 2023 жылғы 31 желтоқсанды қоса алғанға дейін 710 теңге;
- 2024 жылғы 1 қаңтардан бастап 770 теңге мөлшерінде ең төменгі бөлшек сауда бағалары белгіленсін», - деп жазылған Премьер-Министрдің орынбасары – Қаржы министрі Ерұлан Жамаубаев қол қойған құжатта.
Айта кетейік, қазір темекінің бөлшек саудадағы ең төменгі құны - 650 теңге. Ал, келер айдан бастап бұл сома 60 теңгеге қымбаттайды.
Ведомствоның түсіндірмесіне сай, темекі өнімдерінің бөлшек саудадағы шекті бағасының өсуіне мыналар себеп:
- 2023-2024 жылдары акциз мөлшерлемесі 14%-ға көтерілді;
- импортталатын шикізат пен материалдардың құны орта есеппен 20%-ға өсті;
- темекі өнімдерінің шикізаты мен компоненттерінің логистикасы едәуір күрделенді;
- 2022 жылы инфляция 20,3% құрады.
Тиісті бұйрық 1 шілдеден бастап қолданысқа енгізіледі.
