Несиесіз өмір сүруге тырысыңыздар – Данияр Ақышев
Ұлттық банк төрағасы Данияр Ақышев зейнеткерлер әлі де республиканың әлеуметтік белсенді азаматтары екендігін айты. Ол онлайн-конференцияда қаражатты қалай сақтау керектігі және несие алмауға тырысу туралы кеңестер айтты, деп хабарлайды Baq.kz ақпарат агенттігі.
«Ақшаларыңызды банкте сақтаңыздар. Бұл қауіпсіз әрі қолдағы ақшадай жұмсалып кетпейді. 10 млн теңгеге дейінгі депозит сомасы депозиттерді кепілдендіру Қорымен кепілдендірілген. Ұлттық банктің лицензиясы жоқ компанияларға сеніп қалмаңыздар, олар пирамида болып табылатындықтан, әртүрлі бағдарламалар арқылы азаматтардың қалтасын қағуды көздейді. Сондай-ақ, сенімге кіргісі келетін бөтен адамдарға сенбеңіздер. Егер мүмкіндік болса, несие алмауға тырысыңыз. Несиесіз өмір сүру жолдарын қарастырыңыз», - дейді Данияр Ақышев.
Ұлттық банк төрағасы зейнеткерлер әлі де республиканың әлеуметтік белсенді азаматтары екендігін айтты.
«Біз барлық әлеуметтік топқа қаржылық сауаттылық деңгейін арттыру тұрғысынан қараймыз. Кез келген адам қаржылық қызмет түрлерін дұрыс пайдалана білуі керек. Мүмкін болашақта бұл ақпаратты әртараптандыру керек. Зейнеткерлер әлеуметтік белсенді азаматтар болып қала бермек», - дейді ол.
