Қазақстан мұсылмандары діни басқармасының төрағасы, бас мүфти Наурызбай қажы Тағанұлы Құран хатымның қалай оқылатынын айтты, деп хабарлайды Sputnik Қазақстан тілшісі.
"Төтенше жағдайға байланысты мешітте жамағатпен бірге оқылатын намаздарға уақытша шектеу қойдық. Әр азаматтың өмірі мен денсаулығы қымбат құндылық болғандықтан, жұқпалы аурудың алдын алу үшін осындай шешім қабылдауға мәжбүр болдық. Әрине, бұл – уақытша сынақ. Алайда жамағат намазы үшін мешіт есігі жабылғанмен, сауап пен ізгілік есіктері ешқашан жабылмайды", - деді Тағанұлы бүгінгі онлайн брифингте.
Оның айтуынша, қазіргі жағдайда үйден шықпай, онлайн режимде насихат тыңдап, сауапты амалдарға ортақтасуға болады. Осыған байланысты діни басқарма бірнеше жоба қолға алмақ. Атап айтқанда, мүфтият сайтында "Рамазан энциклопедиясы" атты қосымша парақша ашылып отыр. Онда қасиетті ай туралы толық ақпарат алуға болады. Ал "Hikmet TV" студиясы білікті имамдар мен ұстаздардың "30 күнге – 30 уағыз" атты онлайн дәрістерін жүргізеді.
"Хикмет тв" студиясы арқылы Рамазан айында республикалық Әзірет Сұлтан мешітінің қабырғасында күніне бір сағат арнайы онлайн хатым оқылып, қасиетті Қадір түнінде Құран хатым дұғасы жасалады. Баршамызға белгілі, әр жыл сайын біз мешіттерде Құран хатым оқитынбыз. Бірақ, өкінішке қарай, биыл төтенше жағдайға байланысты олай жасай алмаймыз. Біз оның орнына Рамазанның алғашқы күнінен бастап хатым Құранды онлайн режимде оқитын боламыз", - деп атап көрсетті Тағанұлы.
