БАЛАЛЫ БОЛУ ҮШІН ДЕМ САЛДЫРУҒА БОЛА МА?
Сұрақ:
БАЛАЛЫ БОЛУ ҮШІН ДЕМ САЛДЫРУҒА БОЛА МА?
Жауап:
Ислам шариғатында Қасиетті Құран аяттары және ардақты Пайғамбарымыздың (Оған Алланың салауаты мен сәлемі болсын) сүннетінде көрсетілген дұғалар арқылы дем салуға рұқсат етілген.
Себебі, Құран Кәрім аяттарының емдік қасиеті өте көп. Ол жөнінде Жаратушы Хақ тағала: «Құранның болмысында, мүміндерге ем болатын шипа бар. (Біз) оларға Өз мейірімімізді осылай түсіреміз» (әл-Исра сүресі, 82-аят), – деген.
Көп жағдайда әйел адамның жүкті болуына шайтан кедергі келтіріп, қастандық жасайтын көрінеді. Ол жөнінде Пайғамбарымыздың (Оған Алланың салауаты мен сәлемі болсын) хадисінде: «Шайтан жүкті әйелдің жатырындағы қантамырды түртіп түсік тастатады»(Термези), – делінген. Сондықтан, осы кезеңде жүктілік жайлы айтылған аяттарды оқып дем салдыруды ғалымдар құп көреді.
Мысалы, «Әли-Имран» сүресінің: «Ақиқатын айтар болсақ, жерде де, ғарышта да Алладан жасырын қалатын ешнәрсе жоқ. Ана құрсағында жатқан кездеріңде-ақ Алла сендерді Өзі қалаған бейнеге келтірді. Одан өзге Тәңір жоқ. Ол Азиз (аса Үстем) әрі Хаким», – деген 5-6 аяттарын және осы сүренің: «Жаратқан Ием! Құрсағымдағы (нәрестені), тек Сенің жолыңда ықыласпен құлшылық етсін деп (Өзіңе жалбарынып), серт беріп отырмын. Тілегімді қабыл ет. Ақиқатын айтсақ, Сен Естушісің, әрі Білушісің», – деп Имранның әйелі Құдайға жалбарынған еді», – деген 34-аятын, сол секілді басқа да аяттардың арабша нұсқасын оқып, өзіңіз дем салуға немесе білікті (Құранды арабша түпнұсқасынан оқитын) имам-молдаларға салдыруға болады.
Ершат Оңғаров
Исламтанушы, доктор Ph.D
