Ықылым заманда тәуіптерден шипа іздеген халқымыз бүгінде ХХІ ғасырдың игіліктеріне, оның ішінде әуелгі байлығы саналатын денсаулығын күтуде медицинаның жаңа заманғы құрылғылары мен кәсіби мамандар көмегіне жүгінетін болған. Ғалымдар медицинада кәсіби, әсіресе, шетелден білім алып, тәжірибе жинақтаған мамандар тапшылығы байқалатынын алға тартады. Десек те, айырықша емдеу тәсілдерін меңгеруімен ерекшеленетін, жедел сұхбатымыздың бүгінгі қонағы Ершат АХМЕТБЕКҰЛЫ бұл пікірдің жаңсақтау екеніне дәлел бола алатын сияқты. Жоғары санатты маманмен өткізген шағын әңгімені назарларыңызға ұсынып отырмыз.
- Хирургиялық урология саласының көпшілік біле бермейтін қырлары көп шығар. Сіз негізі қандай ауруларды емдейсіз?
- Клиникалық урология және андрологиямен айналысқаныма жиырма екі жыл болды. Хирургиялық урология саласындағы жазылуы қиын, күрделі және созылмалы ауруларды емдеу мен анықтауда үлкен тәжірибе жинақтағаным рас. Өмірде түрлі жағдайлар болады. Бүгінге дейін бүйректі алмастыру, қуықты кесу, қуықты ауыстырып салу, ота жасау, бүйрек обырын радикалды емдеу, простат обырын толық емдеу, бүйрек безінің әртүрлі ісігін кесу, қуық жолындағы мүйізденген тастарды алатын ота, жыныс мүшелерінің пластикасын реттеу және қайта қалпына келтіру, урологиялық жүйедегі ісіктер мен тастарды (бүйрек обыры, қуық обыры, еркектік без обыры) инвазиялық әдісті қолдана отырып, хирургиялық жолмен емдеу сынды көптеген күрделі оталарды жасауға машықтандық қой.
- Ал осылардың ішінде өзіңізді ең көп тәжірибе жинақтау тұрғысынан алғанда қай саланың мықты маманымын деп есептейсіз?
- Жоғарыда аталған ауруларды емдеудегі тәжірибеге ден қойсақ, мен үшін бөле-жарып қарау қиын. Себебі, осы саладағы кез келген ауруды емдеуге әбден маманданғанмын. Десек те, жиі кездесетін аурулардың қатарына еркектік без ауруларын, сондай-ақ, жыныс мүшесінің қалыптан ауытқыған түрін қайта қалпына келтіру мен пластикасын емдеуді жатқызуға болады. Мысалы, несеп, қуық тесіктері, несеп жолы, қынап, жасырын жыныс мүшесі, жыныс мүшесінің сколиозы, қысқа жыныс мүшесін қалпына келтіру оталары бізде аса сәтті өтеді. Сонымен қатар, жыныс мүшесінің протезін салу отасын жасап, жыныс мүшелерінің күре тамырларын қалпына келтіру де еш қиындық туғызбайды. Бедеулікті және өзге де микрографикалық хирургиялық ауруларды да емдейміз. Арнайы отаның көмегімен еркектік бездің қалыптан тыс орналасуының зарарсыз түрін емдеп, простатэктомияны толық жазуға қабілетіміз жетеді.
- Сізді Қытайда білім алған деп естіп жатамыз, жалпы өзіңіз туралы айтып өтсеңіз.
- 1989 жылы Қытайдағы Синьцзян медициналық университетін тәмамдадым. Сол жылдың шілде айында Синьцзян медициналық университеті жанындағы №1 клиникалық аурухананың хирургиялық урология бөліміне жұмысқа орналасып, еңбек жолымды бастадым. Осы емхананың Хирургиялық урология бөлімінің бас дәрігері болдым. Сол жерде 22 жыл қызмет атқардым. Қытай медициналық ассоциациясы жанындағы Синьцзян урологиялық хиругиясы ассоциациясының және Синьцзян андрологиялық ассоциациясының мүшесімін. Елге оралғаннан кейін Алматы қаласында А.Н. Сызғанов атындағы ұлттық ғылыми хирургия орталығында 4 жыл жоғары санатты уролог дәрігер болып еңбек еттім. Қазір «Шығыс медицинасы» атты жеке емханамды ашып, дәрігерлік жолымды жалғастырып жатырмын.
Айнұр БАЛАУБАЕВА.