Адам өмірінің алғашқы 18 жылында оның көру жүйесінің қалыптасуы жүреді, әсіресе мектеп кезеңіндегі балаларда көз жағымсыз әсерлерге сезімтал болады, деп хабарлайды Zakon.kz.
Ал миопия – көздің жеткіліксіз сынуына (рефракция) байланысты кең таралған патология. Миопия кезінде алыстағы заттардан келетін сәулелер көз торына (сетчаткаға) емес, оның алдына сынады. Сондықтан айқын сурет алынбайды және алыстағы заттар бұлыңғыр болып көрінеді.
Алматы қаласының санитариялық-эпидемиологиялық бақылау департаменті мамандары балалар мен жасөспірімдерде миопияның алдын алу шараларын айтты:
1. Көру гигиенасы және көру жүктемесін азайту. Үйде және мектепте оқу үстелі мен орындық баланың бойына сәйкес келуі, үй бөлмесінде немесе сыныпта жарық жеткілікті болу керек. Оқу кезінде көзден кітапқа дейінгі қашықтық кемінде 33 см болуы керек. Теледидар көруді, телефонда және компьютерде ойнауды азайтуға тырысып, осы сабақтар кезінде үзіліс жасау қажет. Монитор экранынан көзге дейінгі қашықтық кемінде 50 см, ал монитор көз деңгейінен сәл жоғары болуы керек. Көлікте оқуға болмайды, өйткені кітап қозғалғанда тербеліп, көздер үлкен жүктеме алады.
2. Күнделікті режимді сақтау. Бала көп қозғалып, таза ауада мүмкіндігінше көп уақыт өткізуі керек. Спорт түрлерімен (жүзу, шаңғы, жүгіру, мәнерлеп сырғанау, бадминтон, теннис, волейбол және футбол) шұғылданғаны абзал. Оқу, үй тапсырмасын орындау кезеңдерін белсенді ойындармен, жаттығулармен немесе серуендеумен ауыстыру өте маңызды.
3. Медициналық бақылау. Бала жыл сайын офтальмологқа баруы керек. Балалар көру қабілетінің біртіндеп нашарлағанын байқамайды және бұл мәселе туралы ата-аналарына уақытында хабарлай бермейді.
4. Теңдестірілген тамақтану. Баланың күнделікті рационында көру өткірлігін сақтауға қабілетті дәрумендер, минералдар және әртүрлі микроэлементтер көп болуы керек. Ата-аналар мәзірге А, Е, В және С дәрумендерінің, лютеиннің, кальцийдің көп мөлшері бар тағамдарды қосуы керек. Күнделікті рационға сүт өнімдерін, жұмыртқаны, бауырды, цитрусты, балықты, сәбізді және қара жидектерді көбейтіңіз (егер балада тамақ аллергиясы болмаса).
5. Көзге арналған гимнастикалар. Бұл көз бұлшық еттерін босаңсытуға және нығайтуға бағытталған қарапайым жаттығулар жиынтығы. Баланы күніне 2-3 рет орындауға үйрету қажет. Мысалы: көзді демалту үшін оқығаннан кейін әр 20 минут сайын 2-3 минут үзіліс жасап, алыстан, терезеден қарап, көзді жұмып, жыпылықтату қажет.