Жас математиктер бақ сынады

Тәуелсіздіктің 20 жылдығына байланысты Алматыдағы дарынды балаларға арналған №165 мамандандырылған мектеп-лицейінде сегізінші-тоғызыншы сынып оқушылары арасында халықаралық математика олимпиадасы болып өтті. Оған республикамыздың Батысы-Шығысы, Оңтүстігі мен Солтүстігіндегі үздік мектептердің оқушылары мен көрші қырғыз елінің алдыңғы қатарлы оқу ошақтарының жас шәкірттері қатысты.
Халықаралық олимпиаданы өткізудегі негізгі мақсат – математиканы көпшілікке тарату, қатысушылардың танымдық, шы­ғар­машылық өрісін дамыту, талантты ба­ла­ларды табу, сыныптан тыс жұмыстарды қарқындату.
Ербол СЕЙІТҰЛЫ, Алматы қалалық дарынды балаларға арналған №165 мамандандырылған мектеп-лицейінің директоры:
– Бұл халықаралық олимпиада Тәуел­сіздігіміздің 20 жылдығына ар­на­лып отыр. Өйткені біздің мектеп-ли­цейі­міз де 1991 жылы ашылған. Яғни бұл оқу ошағы – Тәуелсіздігіміздің құр­дасы. Осы екі 20 жылдық мерекенің қар­саңында еліміздің түкпір-түкпірінен және көрші елдің үздік мектеп оқу­шы­лары арасында халықаралық олим­пиада өткізіп отырмыз. Оны сегізінші-тоғызыншы сынып оқушылары ара­сын­да өткізуіміздегі басты себеп, жалпы рес­публикалық, халықаралық дәре­же­дегі мұндай жарыстар тек 10-11 сынып оқушылары аралығында ғана өтетін. Ал 8-9 сыныптар онша қамтылмайтын еді. Осыны ескеріп, біз бұл шараны 8-9 сынып оқушылары арасында ұйым­дастырдық.
Жалпы үш күнге созылған бұл жарыстың бірінші күні балалар өздеріне тиесілі есепті шығарып болғаннан кейін, олимпиаданы ұйым­дастырушылар қатысушы барлық балаларды автобусқа отырғызып, Медеу, Көктөбе секілді Алматының көрікті жер­ле­рін аралатып, суретке түсіріп, қыдыртты.
Екінші күні аталмыш мектептің акт за­лын­да жан-жақтан келген мұғалімдер мен олимпиадаға қатысушы оқушылар бірігіп, дөңгелек үстел өткізді. Онда әр мектеп қалай жұмыс істейді, аймақтарда білім бе­ру ісі қалай жүргізіледі, жалпы оқу­шы­лар­дың білімін қайтсек тиімді етеміз деген та­қырыпта өзекті мәселелер көтерілді.
Үшінші күні жарыстың қорытындысы шы­ғып, жеңімпаз командалар анықталды. Ол бойынша, командалық есепте бас жүл­дені Тараз қаласының Дарынды ер ба­ла­лар­ға арналған қазақ-түрік мектеп-интер­на­тының оқушылары жеңіп алды. Оларға Тәуелсіздік монументі мүсінінің алтын жа­ла­тылған кішірейтілген нұсқасы сыйға тар­тыл­ды. Бірінші орынды Алматы қаласының №134 мектеп-лицейі иеленді. Олар да Тәуелсіздік монументінің бронзадан құйылған кішірейтілген көшірмесін алды. Екінші орынды Алматыдағы №165 мектеп ли­цейі мен О.Жәутіков атындағы Рес­пуб­ликалық мамандандырылған дарынды балаларға арналған физика-математика мектеп-интернатының оқушылары бөлісті. Оларға қазақ елінің мақтанып көрсететін – Алтын адамының кішірейтілген көшірмесі табыс етілді. Ал үшінші орынды Павлодар қала­сының №8 мектеп-лицейі, Талды­қор­ған қаласының Назарбаев атындағы зият­кер­лік мектебі және Алматыдағы №173 мектеп-лицейлері өзара бөлісті. Олар бұл шара ірі мегаполисте өткендіктен, Алма­ты­ның символы – алма бейнеленген мүсінді иеленді.
Жеке сында төрт бірінші орын алған оқу­­шының мойындарына жібек бауға та­ғыл­ған алтын медаль ілінді. Сондай-ақ циф­­рлық фотоаппараттар табыс етілді. Екінші орын алған сегіз оқушы күміс медаль­ға қол жеткізіп, «Nokia» ұялы те­ле­фон­да­рын иеленді. Үшінші орында қола ме­даль­ды иеленген 12 оқушыға DVD пле­ерлер бе­рілді. Оның сыртында олим­пиа­да­ға қа­тыс­қан алты оқушының әр­қай­сы­сына ынталандыру грамотасы тап­сы­рыл­ды.
Саят АҒЫБАЕВ, Алматы қаласы Бостандық ауданы әкімінің орынбасары:
– Мұндай ірі олимпиаданың Алматы қаласы Бостандық ауданындағы №165 мектеп-лицейінде өтуі – бұл мектептің білім саласындағы деңгейін көрсетіп отыр деуге болады. Бұл оқу ошағы Бос­тан­дық ауданына ғана емес, Алматы қа­ласына, республикаға танымал мек­теп. Тіпті республикадағы үздік 100 мек­тептің бірі. Тәуелсіздіктің 20 жыл­ды­ғына арналған халықаралық олим­пиа­даға жан-жақтан сайдың тасындай  жігіттер қатысып, өздерінің бақ­та­рын сынады. «Жүзден жүйрік, мыңнан тұлпарлар» озып шықты. «Бақ шаба ма, бап шаба ма?» дегендей, бұл жерде бас­тысы орын алу емес, осындай халық­аралық олимпиадаға қатысудың өзі – үлкен жетістік. Сондықтан осы оқу­шы­ларды оқытып, тәрбиелеп, осындай жетістікке жеткізген ұстаздар қауымына алғысым шексіз. Бұл олим­пиа­да ба­ла­лар­дың білімін шың­дауға, ақпарат ал­ма­суына мол мүмкіндік берді. Сон­дық­тан бұл жерде жеңіске жеткен ең бірінші – достық пейіл. Еліміз­дің түкпір-түк­пі­рінен келген оқу­шылар бір-бірімен та­нысып, тәжірибе ал­масып, достасып қал­ды. Ең ма­ңыз­дысы – осы.
Данияр КАМАЛ, Тараз қалалық Дарынды ер балаларға арналған қазақ-түрік мектеп-интернатының оқушысы, халықаралық олимпиаданың алтын жүлде иегері:
– Мен есеп шығаруды ұнатамын. Өскенде банкир болғым келеді. Мен үшін математика – ғылымдардың негізі. Барлық қаржы институттары тәуе­кел­дер­ді басқару үшін статистика мен ма­те­­матикалық модельдерге сүйенеді. Мектепті бітірген соң, Назарбаев атын­дағы университетте білімімді шың­да­ғым келеді. Алған білімім мен тә­жі­ри­бем­ді елімнің дамуына жұмсаймын.
Жарыс соңы мектеп оқушыларының ұйымдастырған мерекелік концертіне ұласты.