Ұландар ұлы тұлғаны ұлықтады

Алматыдағы «Ұлан» гвар­диясының №0111 әскери бөлі­мінде мемлекет және қоғам қайраткері Дінмұхаммед Қонаевтың туғанына 100 жыл толуына орай «Ол – кемеңгер, ғажайып тұлға» атты әдеби-сазды кеш өтті. Алматы қалалық №27, №32 және №0111 әкери бөлім кітапханаларының ұйымдастыруымен өткен шараға Дінмұхаммед Қонаевтың қарын­дасы Сара Ахметқызы арнайы келіп, жас ұландарға ақ батасын берді.
Ұйымдастырушылардың айтуынша, шараның мақсаты – ұлы тұлғаның өмірі мен қайраткерлік қырын әскерилерге үлгі ете отырып, олардың бойындағы отан­сүйгіштік қасиетті ояту. Қаршадай ақын Жамбыл Дүйсенов Қонаев атасына арнап шығарған жыр шумақтарын тарту етсе, ұландар да қалыспай, өз өнерлерін ортаға салды. Ән айтылып, күй тартылып, өлең оқылған жиында «Заманымыздың заңғар ұлы» атты кітап көрмесі де көңіл сүйсіндірді. Дінмұхаммед Қонаев жайында деректі фильм көрсетіліп, оның тағылымды өмірі­нен сыр шертілді. Кітапхана қыз­меткерлері мен әскери басшыларға Қонаев мұра­жайының директоры Тимур Жұманов ұлы қайраткер туралы естелік кітаптарды сыйға тартты.
Сара ҚОНАЕВА, Димекеңнің қарындасы:
– Менің ағам осында жиналған сар­баздардай жас кезінде жалындап тұратын. Қайтпас қайсарлығының, ұлтын сүйген қайраткерлігінің арқа­сында үлкен белестерді бағындырды. Оның еңбек­қорлығы, адалдығы, әділ­дігі, отансүйгіштігі жас буынның да бойынан көрініс тапқанын қалаймын.