Түркі құндылықтары ұлықталды

Орхон-Енисей жазулары - көнеден жеткен мәңгілік асыл қазынамыз. Тарихымыздың терең қойнауларынан сыр шертетін жәдігерлеріміздің қайсысына үңілсек те, ежелгі түркі мәдениетімен астасып жататын құндылықтарға толы екені белгілі. Ал мұның бүгінгі ұрпаққа еркін жетуіне түркі тарихын зерттеуші ғалым Лев Гумилевтің сіңірген еңбегі зор. Ал үстіміздегі жылы әйгілі ғалымның туғанына 100 жыл толып отыр.
Осы орайда жақында Семей қалалық мәдениет сарайында «Арғы атам – Ер Тү­рік, біз қазақ еліміз» атты әдеби-телеви­зиялық кеш өтті. Кештің ашылу салтана­тын­да сөз алған белгілі энциклопедист-ғалым, «Алаштану» ғылыми-зерттеу орта­лығының директоры Тұрдықұл Шаңбай шара маңызын түсіндіре келіп, Семей қа­лалық мәдениет және тілдерді дамыту бө­лі­мінің бастығы Қ.Нұрқасымға «Лев Гуми­лев» атты энциклопедиялық кітапты тарту етті. Сонымен бірге түркі әлеміне қатысты қалалық орталық кітапхана ұйымдастырған «Төрткіл дүниеге танымал ер Түрік» атты кітап көрмесі мен Л.Гумилевтің 100 жыл­ды­ғына орай жасалған арнайы стендт те шара маңызын арттыра түсті.
Сондай-ақ жастар үшін арғы тегін біліп, танымын арттыру мақсатында Моңғолия жеріндегі Күлтегін ескерткіші көшірмесі­нің Астанаға әкеліну тарихын, оны Елбасы
Н.Назарбаев бастаған Үкімет мүшелерінің салтанатты түрде қабылдап алу сәтін баян­дайтын деректі фильм көрсетілді. Биыл осымен төртінші мәрте көрсетіліп отырса да, бұл фильмнің жастар бойына пат­риоттық рухты ұялатып, өткенін біліп өсуіне тигізер септігі зор.