«Сырғалым» телехикаясының DVD нұсқасы сатылымға шығады
Режиссерлер Рашид Сүлейменов мен Дмитрий Коробкин түсірген «Сырғалым» телехикасының DVD нұсқасы сатылымға шықпақ. Бейнетаспаның тұсаукесері ағымдағы жылдың 19 маусым күні Алматыдағы «Меломен» дүкенінде өтетін болады.
«Сырғалым» телехикаясы қазіргі заманғы отбасының күнделікті өмірінен сыр шертеді. «Қазақстан» телеарнасының тапсырысы бойынша «Көркем фильм» кинокомпаниясы түсірген отандық «Сырғалым» және «Сырғалым-2» телехикаялары қазақстандық тележобалардың сапасын жоғары дәрежеге көтере алғаны анық. Түсірілім барасында сценарий жазу мен режиссурада қазіргі заманға лайықты әдістер қолданылып, жоғары сапалы декорациялар құрылды. Сериалды 1 млн-ға жуық көрермен тамашалады.
Телехикаяның тағы бір ерекшелігі, мұнда қазақ тілінің тазалығына аса көңіл бөлінген. Бұған қоса тележобаны орыс тілді көрермендер де тамашалай алады.
Телехикаяның басты ролдерін Жұлдыз Маханова, Шер Әлі, Омар Қиқымов, Қалампыр Айсанғалиева, Әлихан Ыдырышева, Жандарбек Садырбаев сомдаған.
Алғаш рет аталған фильм «Қазақстан» ұлттық арнасында 2014 жылдың басында көрермендер назарына ұсынылған болатын. Телехикая бұған дейінгі түсірілген телехикаялардан әлдеқайда көп аудитория жинап, көрермендердің көңілінен шыға білді.
Айта кетейік, сериал өткен жылы «Жыл таңдауы» байқауында «Ең үздік телехикая» номинациясын жеңіп алған еді. Ал, басты рөлді сомдаған актриса Жұлдыз Маханова «Ең үздік актриса» атағымен марапатталды.
Baq.kz
