Суретшілер отбасының көрмесі

Кеше Қазақстан Респуб­ли­касының Мем­ле­кет­тік орталық мұражайында белгілі суретші Рыстан Өмірзақтың «Атамекен» атты сурет көрмесінің ашылуы болды. Көрмеге суретші мен оның отбасы мүшелерінің 60-тан астам туындылары қойылған.
Ұлттық құндылықтарымызды қазақы на­қышта бейнелеп жүрген қылқалам ше­бері Рыстан Өмірзақтың туындылары те­рең философиялық мазмұнға құралған. Ол сондай-ақ еуропалық біліммен сусын­да­ғын санаулы қазақ суретшілерінің бірі.
Өнертану саласы білгірлерінің айтуы бойынша оның салған оюлары өткен замандардағы нұс­қа­лардан бөлек, жаңаша сипатқа ие. Осы ретте Рыстан Өмірзақов әлемге әйгілі Пикассо, Матисса туын­ды­ла­рының түп­нұс­қаларын зерттеу арқылы өзі де жазық кенепке ерекше ізденістер енгізу мүм­кін­дігін меңгерген өнер шебері деуге болады. Өзінің қолтаңбасын айшықтау үшін суретші тектік белгілер ретінде тау тас­та­рына салын­ған көне суреттерді жиі пай­да­ланады.
Суретшінің бір ерекшелігі, көне дүние мен қазіргі заманғы ұғымдарды өзара бай­ланыстырып, айтар ойын ұлттық ою-өр­нектер арқылы жеткізуге тырысады. Атал­ған көрмеге сондай-ақ суретшінің жары Кәлемхан Рахметбай, дарынды қыз­дары,  көптеген халықаралық бай­қау­лар­дың қатысушысы Айнұр мен Мемлекеттік «Дарын» жастар сыйлығының лауреаты атанған Гүлназымның да бірнеше туын­ды­лары қойылған.
Мұнда жекелеген еңбектерімен қатар, суретшінің жарымен бірлесіп салған су­рет­тері мен кестелері де көрген көзді сүй­сіндірмей қоймасы анық. Мамандар көр­ме­дегі тың тақырыптағы ерекше туын­ды­лар­ды тиісінше бағалап, ұлттық бейнелеу өнеріне жаңа даму үрдісі келе жатқанын атап өтті.
Отбасылық сурет көрмесі алдағы 14 ақпанға дейін жалғасады.