Шәмші фильмі Шымкенттіктермен қауышты

Шымкентте «Шәмші» деректі-көркем фильмінің тұсауы кесілді. Журналис­терге ұйымдастырылған, арнайы баспасөз мәслиха­тын­да фильмнің атқарушы продюсері, композитор, белгілі қоғам қайраткері Қалдыбек Құрманәлі шараны өткізуге қолдау көрсет­кен Оңтүстік Қазақстан облысының әкімдігіне алғысын білдірді.
Қалдыбек ҚҰРМАНӘЛІ, Шәмшітанушы, композитор:
– Ұлы Шәмші ағамыз Шәуілдірде туылған. Ордалы Оңтүстіктің тумасы. Облыста ұлы сазгердің атында көше бар. Ескерткіш орнатылды. Облыстық филармонияға Шәмші Қалдаяқов есімі берілген. Жыл сайын облыстық, рес­публи­калық деңгейдегі әртүрлі шара­лар өтіп тұрады.
Түсірілім жұмысы 20 жылға созылған осынау фильмде Шәмші өмірінен жазып алынған құнды кадрлар бар. «Вальс пат­ша­сының» күнделікті өмірін бейне таспаға түсірген фильмнің режис­сері Тілеген Ахметтің айтуынша, 1991 жылы баста­лып, кейін түрлі себептермен түсірілуі тоқ­таған деректі лента 2011 жылы монтаж­далыпты.
Тілеген АХМЕТ, Фильмнің режиссері:
– Шәмші мүлдем зерттелмеген. Ол туралы дерек жоқ. Сондықтан деректі фильм деп атағанымызбен, онда көркемдік-қойылымдық эпи­зодтарды енгізуге тура келді. Өйткені халық композитор туралы неғұрлым көбірек мағлұмат алғысы келеді.
1991 жылы түсірілім жұмысын бастай­мыз деп жүргенде Шәкең кенеттен ауырып қалды. Сол сәттерде, Сабырхан Асанов «ертерек кино түсірмесең, кешігіп қала­сың», – деген соң Шымкентке келіп, Темір совхозына барып, басында елтірі шәпкісі, қолында темекісін тартып отырған бейне­сін түсіріп алғанмын. 
Фильм сценарийінің авторы – Қали Сәрсенбай. Фильмнің редакторы – Сәкен Сыбанбай. Басты рөлдерде – Жомарт Зей­нәбілов, Аманқос Садықов, Шәмші-Қал­даяқ Құрманәлі және Мерей Заман­бек­қызы ойнаған. Фильмнің тұсаукесер рәсімінде көп жылдар бойы ұлы сазгердің асыл мұрасын жинап, насихаттап жүрген Қалдыбек Құрманәліге облыс әкімі аппа­рат жетекшісінің орынба­сары, баспасөз қызметінің басшысы Берік Уәли Оңтүстік Қазақстан облысы әкімінің алғыс хатын табыстады. Іс-шараға облыстық бірқатар ақпарат құралдарының басшылары, зиялы қауым өкілдері мен жастар қатысты.