Ғалымға ұрпақ тағзымы

С.Торайғыров атындағы Павлодар мемлекеттік универ­ситетінде философия ғылымы­ның докторы, профессор, киелі Кереку жерінің тумасы, ел мақтанышы Шүлембаев Қатыршат Шапағатұлының 75 жылдығына орай,  «Ғылым, философия, дін: қазіргі білімдегі өзара әрекеттестігі» атты республикалық ғылыми-тәжірибелік конференция өтті.
Конференцияға Павлодар облысының әкімі Е.Арын, ғалымның замандастары, шәкірттері және туған-туыстары арнайы келіп қатысты. Шараның шымылдығы атал­мыш оқу орнында Қатыршат Шапа­ғатұлы­ның есімі берілген аудиторияның ашылу салтанатымен басталды. Аудито­рияның лентасын ПМУ ректоры Серік Өмірбаев пен Қатыршат Шапағатұлының қарындасы Рымкеш Шапағатқызы кесті. Онда ғалымның жарық көрген еңбекте­рінен жасақталған кітапхана қоры, өмір жолы және жалпы пәлсападан хабар беретін құндылықтар қойылған.
Пленарлық отырыста сөз алған облыс басшысы әңгімесін Қатыршат Шапағатұлы жайындағы естеліктерден бастады. «Қатыр­шат ағаны мен бала кезімнен танимын. Ол кісі менің әкеммен қызметтес болды. Ал ағаның тұңғышы марқұм Дана екеуміз бірге оқыдық. Кейіннен жеңгеміз Манура апамызбен бірге жұмыс істедік. Қатыршат Шапағатұлы текті жерден шыққан адам еді...» – деп еске ала отырып сөзін сабақтаған облыс басшысы барша қатысушыларға алғысын білдірді.
Ал ғалымның шәкірті, профессор Дәу­рен Құсайынов ұстазын асқан толға­ныспен еске ала отырып, «Қатыршат Ша­па­ғатұлы – ұстаз, қазақтың ағартушылық филосо­фиясын жалғастырушы» тақыры­бындағы баяндамасын ел назарына ұсын­ды.