Этнографиялық әңгімелер жарық көрді

Халықаралық «Алаш» сыйлығының лауреаты, ақын Қасымхан Бегманов этнограф ғалым Жағда Бабалықұлымен сыр-сұхбаттан тұратын «Этнографпен әңгіме» және «Салты мықтының – халқы мықты» атты жаңа кітаптарының тұсаукесерін өткізді. Қасымхан Бегмановтың айтуынша, туындылар қазақ халқының салт-дәстүріне, әдет-ғұрпына арналған таптырмас мұра.
ҚР Ұлттық кітапханасында өткен тұсау­ке­серге ғалымдар, қоғам қайраткерлері жи­налды. Этнограф ғалым Жағда Баба­лық­ұлының мұрасын жан-жақты сөз еткен олар Қасымхан ақынның сыр-сұхбат түрін­де шығарған еңбегіне тәнті болды. Жағда Ба­балықұлының қасында жүріп, көзі тірі­сінде қазақтың фольклорын жазып алған Қа­сымхан ақынның айтуынша, респуб­ли­калық «Дәстүр» баспасынан шыққан «Эт­нографпен әңгіме» кітабында аса көрнекті этног­раф ғалым Жағда ағамыздың өміріне қатысты және халқымыздың ұмыт бола бас­таған салт-дәстүрі, әдет-ғұрпы, тарихы, мә­дениеті, көне сөздері, ұлттық киімі, таға­мы, саятшылық дәстүрі тағы басқа де­ректер қамтылған. «Салты мықтының – хал­қы мықты» кітабы «Өлке» баспасынан шық­қан, автор тарапынан бірнеше бөлім­дер мен тарауларға бөлініп, оқырманға ық­шамдалып ұсынылған. Қос кітап та хал­қымыздың ата-салтын насихаттайды.
Асылы ОСМАН, Қазақстан халқы Ассамблеясының мүшесі:
– Жағда Бабалықұлы дарынды тұл­ға еді. Ол сөйлегенде де ұлттық рухта сөй­лейтін. Көненің көзі ретінде қазақ фоль­клорын терең білді. Тағдырдың ол кісі­ге берген сыйы мол деп есептеймін. Бо­­йына сіңіріп, барын халқына жұмса­ды. Қасым­хан­ның бүгінгі еңбегі келе­ше­гіміз үшін аса қа­жет. Себебі ол – тарих, ол – дәстүр.
Қасымхан БЕГМАНОВ, Халықаралық «Алаш» сыйлығының лауреаты, туындылардың авторы:
– Мен Жағда Бабалықұлын қаланың ор­та­с­ында отырған үлкен қазына деп ой­ла­дым. Себебі қасымда отыр, архив­ке бар­май­сың, басқа мемлекеттерге ат­танбайсың. Ол кісімен 2-3 жылдың кө­лемінде тығыз жұ­мыс жасадық. Ап­таның әр күнінде 3-4 сағат­тан фольклор тура­лы әңгімелесіп, со­сын кітапқа ұла­сып кетті.