Егемен елдің жалынды жастары киелі мекенді жырға бөледі

Қасиет пен құт қонған Ертістің Кереку өңірі – талантты тұлғаларды туғызған киелі топырақ. Әлқиссасы әріден басталатын ажарлы мекенде Бұқар жырау, Жаяу Мұса, Сұлтанмахмұт Торайғыров сияқты ақындар мен Естай Беркімбаев сынды қазақтың әншілік өнер майталмандары дүние есігін ашқан. Осы жерде әйгілі академиктер Қаныш Сәтбаев пен Әлкей Марғұлан, қазақ әдебиетінде есімдері алтын әріптермен жазылған Жүсіпбек Аймауытов, Сәбит Дөнентаев, Иса Байзақов секілді алыптар туған. Қазақ әдебиетінің көшінде жүрген Олжас Сүлейменов, Мұзафар Әлімбаев, Қабдыкәрім Ыдырысов, Мүбарак Жаманбалинов, Аманжол Шамкеновтің кіндік қаны тамған тарихи өлке.
Ұлылар шыққан ұлық мекенде әде­биет­тің, өнердің, мәдениеттің өресі әлі де биігінен түспей, салтанат құрып келеді. Соңғы уақыттарда өңірлік әдебиет даму­дың даңғыл жолына түсті. Ұлттық өнердің ел арасында насихатталуы да жаңаша ба­ғыт-бағдар алған. Облысымызда жас ақын­дар мектебі қалыптасып, өз жемісін беруде. Ақындар айтысы үнемі ұйым­дас­ты­рылып, жыр мүшәйраларын өткізу дәс­түр­ге айналған.
Осыдан төрт жыл бұрын өткен жас қа­лам­­герлердің «Баянауыл – 2007» рес­пуб­ликалық форумы талай жас қаламгердің танылмай жүрген талантын жарқ еткізіп еді. Жастардың «осындай шара тағы да өт­се екен» деген ізгі арманы көп ұзамай орындалып, Тәуелсіз еліміздің сөз ұстаған жастары 11-12 қазан күндері тағы да Пав­ло­дар қаласында өткен «Тәуелсіздік тұ­ғы­ры» атты республикалық фестивальда бас қосты.
Ел Тәуелсіздігінің 20 жылдығына ар­нал­ған шараны Павлодар облысы әкімдігі мен Қазақстан Жазушылар одағы бірлесіп ұйымдастырды. Шараға қазақ әдебиетінің көрнекті өкілдері: ҚР Президент Әкімшілігі ішкі саясат бөлімі меңгерушісінің орын­ба­са­ры, жазушы, Мемлекеттік сыйлықтың лау­реаты Әлібек Асқар, Қазақстан Жазу­шы­лар одағы басқарма төрағасының бірін­ші орынбасары, ақын, Халықаралық «Алаш» әдеби сыйлығының лауреаты Ға­лым Жайлыбай, «Қаламгер-Медиа» ор­та­лы­ғының директоры, Халықаралық «Ша­быт» фестивалінің, «Дарын» Мемлекеттік жас­тар сыйлығының лауреаты Жанарбек Әшім­жан, жазушы, тарихшы, Мемлекеттік сыйлықтың лауреаты Қойшығара Сал­ға­ра­ұлы, жазушы, драматург, Мемлекеттік сый­лықтың лауреаты Төлен Әбдіков, Қазақ­стан Жазушылар одағы жастар сек­ция­сының жетекшісі, ақын, жазушы Бейбіт Сарыбай, көрнекті ақын, Қазақстанның еңбек сіңірген қайраткері Серік Ақ­сұң­қар­ұлы, жазушы, «Қасым» журналының бас ре­дакторы, ақын Серік Сағынтай шақы­рыл­ды.
Фестивальға қатысуға ниет білдір­ген­дер­дің қатары қалың болыпты. Ақтық кезеңге жолдама алған 20 жас қаламгер – жүзден жүйрік шыққандар. Бұлардың бар­лығы сайдың тасындай іріктеліп, әде­биет алыптарының елегінен өткен. Жа­лын­ды жырларымен, өміршең туындыларымен аға буынның ықыласына бөленген 20 жүй­рік қасиетті мекенде жырдың тиегін ағыт­ты. Жастардың шығармалары дүйім жұрт­ты еліктіріп әкетті.
– 1970 жылдардың басында Павлодар жерінде жас ақын-жазушылардың мәжілісі өткен еді. Сол жиынға жас жазушы болып мен де қатысқанмын. Бүгінде дәл сондай жас­тарды көріп, толғанып отырмын. Тәуелсіз елдің жастары қандай бақытты!? Олар өзге біреудің бодандығына шыр­мал­май, туған жер үшін қызмет етеді. Осының өзі зор бақыт емес пе?! Жалпы, кез келген өнердің қызметі – адамды жақсылыққа же­телеп, ізгілікке ұмтылдыру. Өнерде үл­кен, кіші деген жоқ әрі ол ақылмен жа­сал­майды. Біреудің ақылымен жүрген адам ешқашан қаламгер болмайды. Өнер – Жаратушы иеміздің теңдессіз сыйы. Ал оны жетілдіріп, елге жеткізетін – білім. Осын­дай мақсатты алдына қойған адам­ның ғана еңбегін халық бағалайды. Сон­дық­тан жастар «біз әлі жаспыз» деп жауап­сыз­дық танытудан аулақ болу керек, – дейді жазушы Қойшығара Салғараұлы.
Фестивальға шақырылған ұл-қыз­дар­дың бәріне осы өңірдің белгілі тұл­ға­ла­ры­ның атындағы сыйлықтар тағайындалды. Сондай-ақ қазақ әдебиетінің тау тұлға­ла­ры, осы жылы қайтыс болған ақындар Қа­дыр Мырза Әлі мен Тұманбай Мол­да­ға­лиев атындағы сыйлықтар да өз иелерін тап­ты. Айта кетерлігі, осыдан бір апта бұ­рын оқырманымен қош айтысқан ақын Тұ­манбай Молдағалиев атындағы әдеби сыйлық тұңғыш рет Павлодар қаласында тағайындалды. Осылайша, республикалық фестиваль қазақ поэзиясындағы жаңа та­рих­тың парағын ашты.
Фестиваль қорытындысы бойынша қа­ра­ғандылық Жанат Тілегеновтің, Алматы қаласынан келген ақын Алтыншапақ Хау­тай­дың және алматылық прозашы Алмас Нүсіповтің жинақтары жарық көретін бол­ды. Сонымен қатар облыс әкімінің орын­ба­сары Әлия Ғалымова фестивальға қаты­су­шылардың туындылары жинақ болып Тәуелсіздік мерекесіне дейін оқырманға жол тартады деп сендірді. Шараға ша­қы­рыл­ған жас ақын-жазушылар фестиваль дәс­түрлі түрде республиканың әр ай­ма­ғында ұйымдастырылып тұрса деген ниет­те­рін де жеткізді.
Фестиваль аясында облыс әкімі Ба­қыт­жан Сағынтаевтың бастамасымен жарық көрген «Ертіс толқыны» атты кітаптың та­ныс­тырылымы өтті. Бұқар жырау атындағы Әдебиет және өнер мұражайы жинақтың сапалы шығуына өз үлесін қосты. Жинаққа облысымыздың бірқатар дарынды жас ақындарының шығармалары енді. «Ертіс толқыны» жас ақындардың өнердің биік белестеріне деген талпыныстарын танытып қана қоймай, шығармашылық шабыттарын шарықтата түсері анық.
Әлібек АСҚАР, ҚР Президент Әкімшілігі ішкі саясат бөлімі меңгерушісінің орын­ба­са­ры, жазушы:
– 2007 жылы Баянауылда өткен жас қаламгерлер форумына да қа­тыс­қан­мын. Қазақ әдебиетінің марқас­қа­лары жиналған жиында мен де жас­тар­ға арнап өз тілегімді білдірдім. Сонда «Қазіргі жастардың екпіні мықты. Жас тол­қын келе жатыр дейміз-ау. Бірақ бұлар толқын былай тұрсын, жан-жа­ғын жайпай өтетін цунами» деген бо­ла­тынмын. Осы бір сөзім талай әңгімеге арқау болды.
Әлия ҒАЛЫМОВА, Павлодар облысы әкімінің орынбасары:
– Қазақ халқы – әрқашан ақын­да­рын ардақтаған халық. Жүрек сөзін жырмен өрнектеп, жан жылуын өлең­мен аялаған ақыннан асқан сыршыл, нәзік адам жоқ болар, сірә. Ақын – өз елінің шабытты жыршысы. Сонау Естай, Жаяу Мұса, Сұлтанмахмұт Торайғыров секілді дарынды тұлғаларды дүниеге әкелген қасиетті топырақта дарынды жас қаламгерлер өте көп. «Мен жас­тар­ға сенемін» деп Мағжан Жұмабаев жар сала жырлағандай, еліміздің қа­лам­гер жастары біздің өңірде екінші рет бас қосып отыр. Қаламның құдіретін ұққан жастарды Мәшһүр бабамыздың аруағы әрдайым қолдап жүрсін!