«Армандастар» – Керекуде

«Қазақфильм» киностудия­сының режиссері Ерлан Сағынов түсірген «Армандастар» жастар фильмі алғашқы рет павлодар­лық­тардың назарына ұсынылды. Бұл кинотуынды Мемлекет бас­шы­сы Нұрсұлтан Назарбаев­тың мұрындық болуымен бекітілген «Болашақ» бағдарламасы арқылы алыс-жақын шетелде білім алып, елге оралған жастардың өмірін арқау етеді. 
Облыс орталығындағы Ш.Айманов  кинотеатрында тұсауы кесілген отандық киноны тамашалаған көрермен­дер ара­сын­да облыс әкімінің орынбасары, «Бола­шақ» бағдарламасы бойынша білім алған Арын Орсариев те болды.
Арын ОРСАРИЕВ, Павлодар облысы әкімінің орынбасары:
– Дүниежүзіндегі экономикалық дағдарыстың салқыны сезілген кезеңде, 1998-1999 жылдары «Болашақ» бағдарламасы бойынша білім алдым. Сол себепті өмір белестерімнің кейбір сәттері суреттелген фильмнен ерекше әсердемін. Кинодағы әр кейіпкердің ғұмырындағы белгілі бір оқиғалар Францияның Сорбона  университе­тінде өткен студенттік дәуренімді есіме түсірді. Парижде білім алған кезде қатарластарыммен бірге Ұлыстың ұлы күні сынды мерекелерді тойлап, қазақстандық студенттер жұдырықтай жұмылып  бірге жүретінбіз. Фильм кейіпкерлері тап болған қиындықтарды біз де басымыздан өткердік.