Әр ұлттың өнері дәріптелді

Павлодар қаласында «Достық. Бірлік. Тәуелсіздік!» атты ХІV дәстүрлі этникалық мәдениет фестивалі ерекше салтанатпен ұйымдастырылды.
Облыстағы этномәдени орталықтар бұл шараны Қазақстан Тәуелсіздігінің 20 жылдығына орай өткізді. Шара бары­сында қаладағы Мәдениет үйінің сахна­сында ұлттық ұжымдар арнайы концерттік бағ­дарламаларын ұсынды.
Онда Мұсылман әйелдер лигасының, неміс орталығының, грек және поляк бір­лестіктерінің би және вокальдық ансамбль­дері және корей мен украин бірлес­тіктерінің хор ұжымдары өнер көрсетті. Фестивальда сондай-ақ кабардин-балкар, армян, әзірбайжан сынды тау халық­тарының би ұжымдары ерекше сипаттағы би түрлерін жандандырумен көрерменін тәнті етті.
Әртүрлі ұлт өкілдері өнерпаздарының басын қосқан өнер мерекесіне қатысу­шылардың арасынан үздік шыққандар қала басшылығы тарапынан арнайы сый-сыяпаттарға ие болды.