Алматыда джаз фестивалі өтеді
Алматы қаласында 23-26 сәуір аралығында дәстүрлі «Халықаралық джаз мерекесі-2009» музыкалық фестивалі өтеді.
Қатарынан сегізінші рет ұйымдастырылғалы отырған бұл шараға қазақстандық музыканттармен қатар АҚШ, Франция, Түркия, Австрия, Түрікменстан, Өзбекстан сынды елдердің өнер ұжымдары қатысады. Джаз фестиваліне тұңғыш рет белгілі әнші Батырхан Шүкенов және композитор әрі музыка өңдеуші Ринат Ғайсин қатыспақ. Олар бұл жолы өздерінің шығармашылық бірлестігін жаңа қырынан танытып, бұрыннан көпшілікке таныс туындыларды джаз нақышында орындайды. Фестивальда Тагир Зариповтің ұйымдастыруымен дүниеге келген «Джаз бэнд Алматы» жас орындаушылар тобы да өнер көрсетеді. Джаз музыкасын жетік орындауымен әлемге Қазақстанның атын танытып жүрген бұл топтың ең жас орындаушысы бар-жоғы 11-де. Оркестр биыл көпшілік назарына Горден Гудвин мен Гершвиннің туындыларынан концерт ұсынбақ. Фестиваль әдеттегідей Алматыдағы Оқушылар сарайында өтеді.
