Алла Пугачева қазақстандық "The Jigits" тобына ақжол тіледі (ФОТО)
Мәскеуде қазақстандық жас өнер ұжымы «The Jigits» тобының тұсаукесері болды. Бұл өнер тобына ресей эстрадасының примадоннасы Алла Пугачева сәт сапар тіледі. Бұл туралы өзінің Инстаграмдағы парақшасында «The Jigits» продюсері Байғали Серкебаев хабарлады.
«Бүгін ұлы әнші Алла Пугачева «The Jigits» тобының жас әртістеріне батасын берді! Бір кездерде ASTUDIO тобы да осындай құрметке ие болған еді!» - деп жазды Б.Серкебаев фотосуретке түсіндірмесінде.
«Ештеңега алаңдамай алға қарай тарта беріңдер! Сәт сапар, балалар!» - деді ол.
Мәскеу көрермендері үшін топтың таныстырылымы қаладағы беделді клубтардың бірінде өтті. Бұдан бір апта бұрын қазақстандық ұжым өзінің продюсерімен бірге Мәскеу радиостансаларының бірінде қонақта болған еді.
«The Jigits» тобының қатысушылары қазақстандықтарға «Жұлдыздар фабрикасы» жобасы арқылы танымал. 2012 жылы ұжым Қазақстан атынан Юрмаладағы «Жаңа толқын» конкурсына қатысып, құрметті төртінші орынды иеленген болатын.
