Алаш қаласы Қайымды құрметтейді
Семейде «Жол картасы» бағдарламасы бойынша 300 миллион теңгеден астам қаражат бөлінген. Осы бағдарлама шеңберінде шаһарымыздағы мәдени ескерткіштерге жөндеу жұмыстары жүргізілуде.
Облыстық Абай атындағы кітапхана қасындағы Кеңес өкіметі тұсында салынған «Октябрь» стелласы қайта өңделіп, Алаштың ардақтысы Қайым Мұхаметханов пен репрессия құрбандарына арналған мемориал ашылмақ. Бұл мақсатқа 45 миллион теңге қарастырылған.
Николай ИСАЕВ, Семей қаласындағы коммерциялық емес ұйымдар қауымдастығының вице-президенті:
– Қайым – абайтанушы. Оның еңбектерінен Шәкәрім мен Мұхтар Әуезов жайында білеміз. Яғни біз ол арқылы Алаш ардақтыларын тереңірек тани түсеміз. Мемориалдың Абай атындағы кітапхана жанынан бой көтеруі – қуанарлық жағдай. Және бұл қазіргі кезеңнің сәулет өнеріне қосқан үлес болып табылады.
72-квартал ауданындағы «Өлім вагоны» мемориалдық шағын бағы көп жылдан бері күтімсіз қалған болатын. Тек биыл ғана бюджеттен 6 миллион теңге бөлініп, осындағы 1600 шаршы метр жерге тротуар төсеніштері төселді. Шағын бақтағы жол жиектері ауыстырылып, жарық тартылған. Жұмыстар аяқталу кезеңінде. Қазір ескерткіштегі вагондар керамо-гранитпен қапталып жатыр. 500 шаршы метр жері көгалданған. Бұл – 70-жылдардағы монументалдық үлгідегі жалғыз ескерткіш.
