Азия чемпионаты: Боксшы қыздардың финалдағы қарсыластары анықталды
Бокстан 22 жасқа дейінгі жастар арасындағы Азия чемпионатында қазақстандық екі спортшының қарсыластары анықталды, деп хабарлайды ҚазАқпарат тілшісі.
Таиланд астанасы Бангкок қаласында өтіп жатқан құрлықтық додада ел құрамасынан қыздар арасында Жасмин Қизатова (70 келі) вьетнамдық Труонг Мин Тху Кюнхты, Гүлсая Ержан жартылай финалда непалдық Триша Джебегуді тізе бүктіріп, финалға шыққан еді.
Енді ақтық сында Жасмин Қизатова өзбекстандық Азизой Зокировамен қолғап түйістірсе, Гүлсая Ержан таиландтық Пурннипа Чутимен шеберлік байқасады.
Құрлықтық дода жартылай финалында ел құрамасынан Мөлдір Тойкова (50 келі), Әнел Сақыш (54 келі), Виктория Графеева (57 келі), Шахназ Исаева (60 келі), Назерке Серік (63 келі), Ақнар Ищанова (66 келі), Дана Дидай (75 келі) қарсыластарына есе жіберіп, қола жүлдені қанағат тұтты.
