Қазақстан оқушылары есірткіге қарсы тексеруден өтпейтін болды
ҚР Денсаулық сақтау министрлігі халықтың нысаналы топтарының профилактикалық медициналық тексерулерін жүргізу ережесіне өзгерістер мен толықтырулар енгізді, деп хабарлады ҚазАқпарат ҚР ІІМ министрлігінің баспасөз қызметіне сілтеп.
Бұйрық бойынша мектеп оқушылары және 17 жастан асқан балаларға асқазан қатерлі ісігін анықтау, скринингтік зерттеулер, есіркіге қарсы тексеру сияқты түрлі сынақтар жүргізілмейтін болды.
40 жастан 70 жасқа дейінгі азаматтар ағзадағы қант мөлшері мен жүрек соғысының жылдамдығын екі жылда бір рет тексеріп тұрады. Ал 30 жастан асқан әйелдер төрт жылда бір рет жатыр ісігіне қарсы толық тексеруден өтеді.
Сондай-ақ, 40 жастан асқан әйелдерге сүт безінің қатерлі ісігіне қарсы екі жылда бір рет тиісті сынақ жүргізіледі. Бұрын 50 жастан асқан әйелдер ғана тексерілу міндетті болса, қазір оған өзгерістер енгізілді. Сондай-ақ, 50-70 жастағы еркектер мен әйелдер тіркеуде тұрмаса да, тоқ ішектің қатерлі ісігіне қарсы алдын ала тексеруден өтуі керек.
Ғалымдар «тексеру әдісі нақты әрі арзан, қолайлы және қауіпсіз болуы керек» деп отыр. Сонымен қатар, тексеру жұмыстары зертхананың да, тексерілушінің уақытын үнемдейтін болу керек дейді.
Скринингтік тексеру қатерлі ісіктерді және инфекциялық емес ауруларды ерте анықтауға, сондай-ақ халыққа сапалы медициналық қызметтердің қолжетімділігін арттыруға мүмкіндік береді.
