Қытайлар сериялы Volkswagen ID.7-ні көрсетті

Қытайлар бұған дейін де ресми тұсаукесерден бұрын жаңа сериялы модельдер суретін жариялап жіберіп, талай автоөндірушіге тосынсый жасаған, - деп хабарлайды Alashainasy.kz тілшісі Кolesa.kz-ке сілтеме жасап.

Енді кезек ID.7 электромобиліне келіпті, Volkswagen қазірше оның концептісін немесе камуфляжды прототипін ғана көрсеткен.

Сертификат базасында автомобильдің суреті ғана емес, техникалық жағына қатысты біршама ақпарат бар. ID.7-нің ұзындығы — 4956 мм, демек ол Passat моделінен де үлкен деген сөз. Ені — 1862 мм, биіктігі — 1537 мм, дөңгелек базасы — 2965 мм. Аспан асты елінде батареясының сыйымдылығы 77 кВт∙сағ, 204 ат күшіне ие бір мотормен жүретін артқы жетекті нұсқасы ғана сертификат алды.

ID.7 Volkswagen-нің Қытайдағы екі бірлескен зауытында шығады, олардың сырт пішінінде аздаған айырмашылық болады. Қазірше марка FAW-VW кәсіпорны шығаратын ID.7 Vizzion нұсқасын ғана көрсетті.

Компания ID.7-ні биыл сәуірде ресми таныстырады.