Иран көліктері ЕЭО нарығына шығады
Әлемдік брендтер Ресейден кеткеннен кейін Иран автоөндірушілері санкция шырмауында қалған елмен серіктес болуға ниетті деген ақпарат тараған, - деп хабарлайды Alashainasy.kz тілшісі Кolesa.kz-ке сілтеме жасап.
Енді олар сөзден іске көшкен сияқты. AV.by берген мәліметке сүйенсек, Минскідегі «Лаки Кэренси» ұйымы SAIPA маркасының өнімдерін сертификаттауға кірісіпті, болашақта оларды Беларусь пен Ресейде саудалайды.
SAIPA — ауқымы бойынша Ирандағы екінші автоөндіруші, бірақ модельдік топтамасы заманға сай деуге келмейді. Құрамында Quik хетчбэгі мен Saina, Shahin седандары бар.
Quick пен Saina 1987 жылғы Kia Pride платформасының жақсарған нұсқасы саналатын SAIPA X200 платформасына негізделеді. Екі автомобиль де 87 ат күшіне ие 1.5 литрлік мотормен жүреді. Агрегат механика не вариатормен жұмыс істейді.
Shahin базасында SAIPA SP1 жатыр. Одан Toyota B-ге тән шешімдер байқалады. Өйткені 2000 жылғы Yaris пен Vitz дәл осы платформаға негізделген. Shahin капотының астында 5 сатылы механика не 6 сатылы автоматпен жұптасқан 110 ат күшіне ие 1.5 литрлік қозғалтқыш тұрады.
SAIPA Quick
Автомобильдерге сертификат беру процесі шамамен үш айға жуық уақыт алады, содан соң модельдер Беларусь пен Ресей нарығына шыға бастайды.
